Tags-Saya

na jaane dhuup ne apnī zabāñ meñ kyā kah us se
shajar ke jism se saaya nikal kar ban gayā apnā

maiñ jo tanhā rah-e-talab meñ chalā
merā saaya mire aqab meñ chalā

niiñd aa jaa.e to phir dhuup na saaya koī
paañv thak jaa.eñ to pardes bhī ghar lagtā hai

muḌ ke dekhūñ to nahīñ koī magar lagtā hai
ek saaya sā pas-e-gard-e-safar lagtā hai

phir koī yaad saya-afgan hai
dhundlī dhundlī fazā hai dil ke qarīb

nahr pe sāya-bār shajar ke jaal se maujeñ uljhī haiñ
koī 'hasan' us uljhā de koī jaa.e zarā suljhā aa.e

fazl-e-ḳhizāñ ke sūkhe patte haañp rahe haiñ saa.e meñ
saaya apne tah-ḳhānoñ meñ jaa.e unheñ pahuñchā aa.e

dhuup meñ de ke saaya ye būḌhe shajar
kitne peḌoñ ko shāḳheñ harī de ga.e

un dinoñ bhī dard kā saaya mire ham-rāh thā
jab dhuāñ ban kar vo mere zehn par chhā.ī na thī

ye maiñ huuñ yā mirā saaya mirā saaya hai yā maiñ huuñ
ajab sī dhund meñ lipTā huā hai hāfiza merā

raat tum ne raushnī ke khel meñ
kyuuñ mire saa.e pe saaya rakh diyā

kyā kahā tū mirā saaya hai yaqīñ mujh ko nahīñ
shakl to kuchh nazar aatī hai payambar jaisī

rishte naate TuuTe phūTe lage haiñ
jab bhī apnā saaya saath nahīñ hotā

saḌkoñ par sūraj utrā
saaya saaya TuuT gayā

batā ai dil mire bujhte hue dil
ye kis aaseb kā saaya hai tujh par

ek saaya thā jise maiñ ne pakaḌnā chāhā
vo jo hotā thā koī ab nahīñ hotā koī

us raste par do jismoñ kā ik saaya thaa!
aur do rūhoñ kā ik maslak!

har na.ī shaam ye ehsās huā ho goyā
merā saaya mire paikar se baḌā ho goyā

jism-o-jāñ par kisī jogī kā maiñ saaya dekhūñ
ishq kī taal pe jogan kā thiraknā dekhūñ

bargad ke daraḳhtoñ se jañgal phaile haiñ pahāḌ ke dāman meñ
shāḳheñ haiñ jo un kī sāya-fagan zulmat kā samāñ hai har ban meñ