Tags-Saya

ba-rañg-e-sāya hameñ bandagī meñ hai taslīm
ki dāġh-e-dil ba-jabīn-e-kushāda rakhte haiñ

ek saaya sā dar aayā
koī niilā saaya

vo dasht-e-tīrgī hai ki koī sadā na de
saaya bhī mere jism kā mujh ko patā na de

vo koī saaya nahīñ thā maiñ hī thā
dhuup terā ḳhvāh-maḳhvāh harjā huā

masjid ke zer-e-sāya ik ghar banā liyā hai
ye banda-e-kamīna ham-sāya-e-ḳhudā hai

phir yaad bahut aa.egī zulfoñ kī ghanī shaam
jab dhuup meñ saaya koī sar par na milegā

kabhī ḳhurshīd-e-ziyā-bār huuñ maiñ
kabhī saaya pas-e-dīvār huuñ maiñ

maiñ ne ḳhud apnā saaya hī bāñhoñ meñ bhar liyā
us kā ḳhumār chhāyā thā mujh pe kuchh is qadar

yā sar-e-rāh kabhī TuuT ke taare barse
yā kisī chāñd kā bujhtā huā saaya guzrā

saaya bhī saath chhoḌ gayā ab to ai 'asar'
phir kis liye maiñ aaj ko kal se judā karūñ

apnā saaya to maiñ dariyā meñ bahā aayā thā
kaun phir bhaag rahā hai mire pīchhe pīchhe

mujh se kyā pūchhte ho naam pata
maiñ to bas aap kā hī saaya huuñ

us banda-e-ḳhuddār pe nabiyoñ kā hai saaya
jo bhuuk meñ bhī luqma-e-tar par nahīñ girtā

thak jaatā thā bādal saaya karte karte
aur phir maiñ bādal pe saaya kartā thā

kabhī saaya hai kabhī dhuup muqaddar merā
hotā rahtā hai yuuñ hī qarz barābar merā

rātoñ kā chain din kā sukūñ ho agar aziiz
chaltā hai saath saath jo saaya na dekhnā

saaya saaya tamāzatoñ ke hujūm
dhuup bhī sā.ebān bhī ham bhī

ai sāTan ke niile pardo tum par ye kis kā saaya hai
kyā mujh ko kuchh vahm huā hai yā sach-much koī aayā thā

kar liyā hai ḳhud ko chhat maañ baap ne aur
jism kā bachchoñ pe saaya kar liyā hai

misāl-e-sāya mohabbat meñ jaal apnā huuñ
tumhāre saath giraftār-e-hāl apnā huuñ