Tags-Saya

tumhārā saaya bhī jo log dekh lete haiñ
vo aañkh uThā ke nahīñ dekhte parī kī taraf

apnā saaya bhī 'zafar' mujh ko na pahchān sakā
kis na.e bhes meñ maiñ aaj idhar aayā huuñ

ye pariyoñ se chehre jin par jaan chhiḌakte haiñ ham log
mujh ko in peḌoñ ke nīche dhuup milī hai saaya na.iiñ

jab tak sar pe dhuup khaḌī hai
saaya be-ārām chalegā

sūraj kī raushnī meñ kabhī apnī samt dekh
tārīkiyoñ meñ kyā tujhe saaya dikhā.ī de

ik sham.a kā saaya thā ki mehrāb meñ Duubā
ik maiñ ki tire hijr ke girdāb meñ Duubā

kabhī saaya to kabhī dhuup kā manzar badle
dar-o-dīvār hue dasht-numā ghar badle

giit 'firāq' ke jhilmil jhilmil karte haiñ mash.al kī tarah
hurmat kī lai sāya-fagan hai sāvan ke bādal kī tarah

chalūñ to dhuup kā bādal huuñ maiñ ḳhud apnī jagah
rukūñ to har shajar-e-sāyā-dār merā hai

laġhzish-e-pā bhī har ik gaam thī saaya saaya
zindagī tujh se ta.alluq bhī sharīfāna thā

mumTiyoñ par ek gahrī ḳhāmushī sāya-fagan
reñg kar chaltī havā kī bhī sadā aatī nahīñ

sadiyoñ se zamāne kā ye andāz rahā hai
saaya bhī judā ho gayā jab vaqt paḌā hai

kisī kī raah meñ aane kī ye bhī sūrat hai
ki saaya ke liye dīvār ho liyā jaa.e

tumhī koī shajar-e-sāya-dār DhūñD rakho
ki vo to apne liye bhī hai ajnabī kī tarah

jahāñ paḌā tirā saaya ugā vahāñ gulzār
qadam dharā hai tū jis jā banā hai mushk-o-abīr

saaya tak bhaag gayā dekh ke vahshat ghar kī
kyā balā hai ki ilāhī shab-e-furqat na ga.ī

saaya sā ik ḳhayāl kī pahnā.iyoñ meñ thā
sāthī koī to raat kī tanhā.iyoñ meñ thā

ik aisī masāfat hai ki saa.at bhī kaThin hai
sadiyoñ kā safar aur kahīñ saaya nahīñ koī

jalva-gar hai nūr-e-haq hone se yaktā.ī 'amīr'
saaya bhī hotā agar hotā payambar kā javāb

tū ḳhudā hai to bajā mujh ko Darātā kyuuñ hai
jā mubārak ho tujhe tere karam kā saaya