Tags-Sayyad

bulbulo baaġh meñ ġhāfil na kahīñ ho jaanā
har taraf ghaat meñ sayyād nazar aate haiñ

qafas meñ le chalā sayyād mujh ko
ḳhayāl-e-bāl-o-par hai aur maiñ huuñ

ijāzat ik taḌap kī de jo sayyād
qafas ko le uḌeñ ham murġh-e-par-band

kaun thā said-e-vafādār ki ab tak sayyād
bāl-o-par us ke tire tiir liye phirte haiñ

qaid naġhme kī huī qaid-e-qafas par turra
ham se sayyād ko naale bhī sunā.e na ga.e

murġh-e-dil ko zab.h ai sayyād kar
aur taa.ir haiñ sazāvār-e-qafas

kyā hai dāġh-e-ḳhūn-e-bulbul kī bahār
dekh ai sayyād gulzār-e-qafas

jaatā hai kaun aap se jallād kī taraf
khīñchā is āb-o-dāna ne sayyād kī taraf

ḳhauf sayyād se na barq kā Dar
baat ye apne ghar nahīñ hotī

maiñ qafas meñ huuñ qafas pesh--e-nigāh-e-sayyād
par-e-parvāz meñ jumbish kā gumāñ hotā hai

ḳhizāñ kī fikr na ab intizār-e-fasl-e-bahār
chaman meñ shikva-e-sayyād ke sivā kyā hai

ḳhudā samjhe ye kyā sayyād o gulchīñ zulm karte haiñ
guloñ ko toḌte haiñ bulbuloñ ke par katarte haiñ

sayyād ke qafas meñ unheñ bhuuk le ga.ī
panchhī ḳhushī se jaal meñ phañsne nahīñ ga.e

zamzame sun kar mire sayyād-e-gul-rū ne kahā
zab.h kiije aise bulbul ko na chhoḌā chāhiye

asīr-e-nau kī ḳhabar le aa kar zarā tū sayyād-e-zulm-pesha
yahāñ talak huuñ qafas meñ taḌpā ki mere saare haiñ dhajjiyāñ par

vo kaun nāla-e-dil thā qafas meñ ai sayyād
ki misl-e-tīr-e-nazar āsmāñ shikār na thā

sayyād ko phir bhī mirī parvāz kā Dar thā
maiñ garche qafas meñ thā par-o-bāl bañdhe the

aise bhī haiñ ki jin ko rihā.ī kī fikr hai
sharminda maiñ to zahmat-e-sayyād se huā

haa.e vo said ki sayyād ke pīchhe lapke
sar ko fitrāk pe har-dam ba-tafāvul bāñdhe