Tags-Shaam

ai vatan sub.h-e-vatan shām-e-vatan ahl-e-vatan
yaad aatī hai tumhārī dasht-e-ġhurbat dekh kar

bas ek shaam bachī thī tumhāre hisse kī
magar vo shaam bhī yāroñ meñ baañT dī maiñ ne

ye sub.h o shaam yūñhī raheñge mire charāg
bas maiñ tujhe jalāne bujhāne meñ jā.ūñgā

ḳhud hī sargoshiyāñ karte haiñ koī jaise kahe
phir palaT aa.e ye kam-baḳht vahī shām-o-sahar

ik sūraj hai jo shām-Dhale mujhe pursā dene aatā hai
un phūloñ kā jo mere lahū meñ khilne the aur khile nahīñ

hone aur na hone kā ik barzaḳh hai ham jis meñ haiñ
jis meñ shaam ghulī rahtī hai aisī sahar meñ rahte haiñ

tujhī se ḳhvāb haiñ mere tujhī se bedārī
tujhe salīqa hai shām-o-sahar banāne kā

zulf o ruḳh dair o haram shaam o sahar 'aish' in meñ
zulmat-e-kufr bhī hai jalva-e-islām bhī hai

jur.at ai dil mai o miinā hai vo ḳhud-kām bhī hai
bazm aġhyār se ḳhālī bhī hai aur shaam bhī hai

jaise ik abr chalā aa.e barasne ke liye
aise aatī hai tirī yaad sar-e-shām mujhe

sitāra shaam ko jab aañkh khole
achānak chāñd ko pāyāb dekhe

is bhare shahr meñ 'nashtar' koī aisā bhī kahāñ
roz jo shaam meñ ham jaise fuzūloñ se mile

go mā-varā-e-vaqt bhī hai mujh meñ ek chiiz
mīzān-e-sub.h-o-shām meñ taulā gayā huuñ maiñ

shaam kā vaqt ho gayā 'bāqī'
bastiyoñ se sharār aane lage

jo so ke uTThā to rasta ujaaḌ lagtā thā
pahuñchnā thā mujhe manzil pe shaam kar baiThā

thakā-hārā huuñ tanhā huuñ magar ye baat tai hai
maiñ tohfe meñ tujhe ik roz mulk-e-shām dūñgā

hamārā mas.ala ye hai ki shaam hote hī
ham apne aap se thoḌā farār chāhte haiñ

Duub jaatā hai damaktā huā sūraj lekin
mehñdiyāñ shaam ke hāthoñ meñ rachā detā hai

tab-e-raushan ko nahīñ ḳhauf siyah-rozī kā
sub.h-e-mahshar huuñ mujhe shaam se kuchh kaam nahīñ

shām-e-ġham-e-firāq ke pahlū meñ baiTh kar
aa.ī kisī kī yaad to chupke se ro liye