Tags-Shaam

jahāñ shaam o sahar niilī ghaTā.eñ ghir ke aatī haiñ!
ufuq kī god meñ nīlam kī pariyāñ muskurātī haiñ!

udaas shaam nazar aa.ī jaan ke jaisī
jab intizār meñ tere khaḌā rahā thā maiñ

ki thā jo sub.h-e-shagufta na thā vo shaam ke vaqt
jo shaam thā so na dekhā vo sub.h ko sāhib

jalā ke dil ko rakhā sub.h-o-shām roz-o-shab
mirā kamāl kamāl-e-charāġh hai ki nahīñ

din nikalte hī nikal aa.e the kis kī khoj meñ
shaam Dhalte hī chale aa.e haiñ ghar kis ke liye

naanī ke chehre kī lakīroñ ko buntī
bachpan kī har shaam kahānī hotī hai

surḳh sunahrī sabz aur dhānī hotī hai
jhiil kināre shaam suhānī hotī hai

vo manzar bhī kabhī dekhā hai ahl-e-kārvāñ tum ne
umañD kar jab kisī bichhḌe hue par shaam aatī hai

kyuuñ shaam se Duube se ho ummīd ke taaro
ābādī-e-dil-e-shahr-e-ḳhamoshāñ to nahīñ hai

kisī kī aañkh kā taarā huā karte the ham bhī to
achānak shaam kā taarā nazar aayā to yaad aayā

ġhusse se kuchh kahūñ to vo kis tarah chup rahe
ik baat kā jo shaam se de tā-sahar javāb

zulmat-e-shām-e-alam kam karne
apne hī ghar meñ aag lagā dī

nā-murād dil kaise sub.h-o-shām karte haiñ kaise zinda rahte haiñ aur kaise marte haiñ
tum ko kab nazar aa.ī ġham-zadoñ kī tanhā.ī ziist be-amāñ kyā hai tum na jaan pāoge

ab shaam hai to shahr meñ gaañv ke parinde
rahne ke liye koī shajar DhūñD rahe haiñ

milī hai dekhiye ye sub.h-e-hashr se jā kar
lahad kī raat na thī shām-e-ġham hamārī thī

ek bahut hī bojhal shaam ke aate hī
suune dil ko yādoñ kā kohrām milā

us kārvāñ-sarā meñ kyā 'mīr' baar kholeñ
yaañ kuuch lag rahā hai shām-o-sahar hamārā

shaam ho
aam sī shaam ho

khaḌī huī huuñ kināre chanāb ke sar-e-shām
bhañvar bhañvar mirī āñkhoñ meñ ghūmtā hai bas

dil se uThtā hai sub.h-o-shām dhuāñ
koī rahtā hai is makāñ meñ abhī