Tags-Shaam

kaam itne haiñ bayābānoñ ke vīrānoñ ke
shaam ho jaatī hai aur ghar nahīñ dekhā jaatā

hāsil-e-kunj-e-qafas vahm-ba-kaf tanhā.ī
raunaq-e-shām-e-safar tā-ba-sahar sannāTā

aao DhūñDeñ kahāñ gayā sūraj
shaam ke surma.ī jhamele meñ

ġham-e-hayāt ne āvāra kar diyā varna
thī aarzū ki tire dar pe sub.h o shaam kareñ

merī chādar to chhinī thī shaam kī tanhā.ī meñ
be-ridā.ī ko mirī phir de gayā tash.hīr kaun

kyuuñ chhoḌ deñ na shaam se pahle hī terā shahar
tujh se bichhaḌ ke raat basar kis liye kareñ

zikr har sub.h o shaam hai terā
vird-e-āshiq kuuñ naam hai terā

sub.h le jaate haiñ ham apnā janāza ghar se
shaam ko phir ise kāñdhoñ pe uThā laate haiñ

ishq kī avvalīn shart hai kūcha-e-yār se nikal
hosh se be-niyāz ho bhuul jā sub.h-o-shām haiñ

aaj ke din kareñ tajdīd-e-vafā dhartī se
phir vahī sub.h vahī shaam suhānī de de

shaam sāhil pe gum-sum sī baiThī huī
aur dariyā meñ sonā bikhartā huā

tai huā din ki khule shaam ke bistar chaliye
paañv ko hukm thakan kā hai ki ab ghar chaliye

hotā hai koī dam meñ charāġh-e-hayāt gul
shām-e-firāq kyā ho ummīd-e-sahar mujhe

añdheroñ meñ kamī kyā hogī lekin
ye sham.eñ shaam hī se jal rahī haiñ

saare manzar dilkash the har baat suhānī lagtī thī
jīvan kī har shaam hameñ tab ek kahānī lagtī thī

tū bhī ruḳhsat ho rahā hai dhuup bhī Dhalne ko hai
mere andar ik charāġh-e-shām-e-ġham jalne ko hai

ho sub.h-e-raushan ki shām-e-rañgīñ kisī meñ koī kashish nahīñ hai
har ek ḳhvāhish dhuāñ dhuāñ hai na koī aahaT na koī halchal

mausam bāheñ khol rahā hai
gadrā.ī hai shaam basantī

vo mausam jā chukā jis meñ parinde chahchahāte the
ab in peḌoñ kī shāḳhoñ par sukūt-e-shām likh denā

tum apne chāñd taare kahkashāñ chāhe jise denā
mirī āñkhoñ pe apnī diid kī ik shaam likh denā