Tags-Shaam

'saulat' vo kyā maqām thā saa.at thī kaun sī
Thahre hue jahāñ tumheñ shām-o-sahar mile

shaam huī to ghar kī har ik shai par aa kar jhapTe
āñgan kī dahlīz pe baiThe vīrānī ke saa.e

yādeñ khule kivāḌ ye mahkī huī fazā
kaun aa rahā hai shaam ye ThanDī havā ke ba.ad

ye shaam itnī ujaaḌ kyuuñ hai nayā koī hādisa huā hai
ye ḳhuuñ kī surḳhī shafaq ke rañgoñ meñ ghul ga.ī be-vajah nahīñ hai

kis salīqe se vo mujh meñ rāt-bhar rah kar gayā
shaam ko bistar sā kholā sub.h ko tah kar gayā

dhuup sahrā tan barhana ḳhvāhisheñ yādoñ ke khet
shaam aate hī ġhubār-e-rah-guzar ho jā.eñge

'qā.em' ko is tarah se tū detā hai gāliyāñ
jis ko kisī ne aaj talak tū nahīñ kiyā

din ke saath utar jaatī huuñ
shaam ke paar Thahar jaatī huuñ

ziist hai ik shaam afsāne kā naam
apnī apnī dāstāñ sab kah ga.e

hañste hue chehre meñ koī shaam chhupī thī
ḳhush-lahja taḳhātub kī khanak niim chaḌhī thī

mirā gumān hai shāyad ye vāqi.a ho jaa.e
ki shaam mujh meñ Dhale aur sab fanā ho jaa.e

shām-e-ġham intizār meñ un ke
maut kā intizār hotā hai

shaam yuuñ dal ke kināre se guzar jaatī hai
jaise lakḌī koī aare se guzar jaatī hai

jo nasīb āzmānā hai to raat kaisī din kyā
kahīñ sub.h kar ke dekho kahīñ shaam kar ke dekho

darvāze makānoñ ke hue band sar-e-shām
kahte haiñ magar ye ki jiyāloñ kā nagar thā

hai ġham-e-roz-e-judā.ī na nashāt-e-shab-e-vasl
ho ga.ī aur hī kuchh shām-o-sahar kī sūrat

āzrāna the mirī vahshat-e-dil ke sab rañg
shaam se sub.h talak Dhalte the paikar kyā kyā

Dhalegī raat to phailegā nuur bhī is kā
charāġh apnā sar-e-shām jhilmilātā hai

kis tavaqqo.a pe sañvarne lagī phir sochtī shaam
kis kī āñkhoñ kī chamak rāsta dikhlātī hai

vo bhī ik shaam thī jab saath chhuTā thā us kā
vāhime dil meñ sar-e-shām dar aate haiñ ka.ī