Tags-Shahr

jaane kaun se raste pe kho jaa.e vo
shahr meñ bhī āseboñ kā Dar rahtā hai

ga.e dinoñ ke tabassum kī raakh bikhrī hai
havā-e-shahr mire dil meñ DhūñDhtī kyā hai

niiñd meñ mahvashān-e-shahr bosa-e-āshiqāñ kī ḳhair
shab-ba-havā-e-narm-sair sub.h huī sile ga.e

jab shahr ke log na rastā deñ kyuuñ ban meñ na jā bisrām kare
dīvānoñ kī sī na baat kare to aur kare dīvānā kyā

shahr the ūñchī fasīloñ vaale
Dar zamāne ke pare lagte the

tū hī har riñd kā qibla ho zarūrī to nahīñ
shahr meñ kam nahīñ āñkhoñ se pilāne vaale

tujh ko hai is dasht ko shahr banāne kī dhun
dekh isī dasht meñ terā divāna bhī hai

ye shahr-e-sañg hai patthar ke log rahte haiñ
yahāñ pe phol khilāne kī zid nahīñ karte

dam-ba-dam ek dīvār uThtī ga.ī ik chhurī merā siina khurachtī ga.ī
jaise jaise ghuTan shahar kī baḌh chalī maiñ ne dil meñ nayā ek dar kar liyā

tum ne kyuuñ bārūd bichhā dī dhartī par
maiñ to duā kā shahr basāne vaalā thā

yaar ik baar parindoñ ko hukūmat de do
ye kisī shahr ko maqtal nahīñ hone deñge

bahā ke le gayā sailāb rāste jin ke
vo shahr apne ḳhayāloñ meñ ab bhī baste haiñ

apne dīdār kā sharbat to pilā de ham ko
ham to aa.e haiñ tire shahr se jaane ke liye

fasīl-e-shahr ko jab tak girā nahīñ deñge
hameñ ye log kabhī rāsta nahīñ deñge

log dekheñge tujhe shahr meñ charchā hogā
ġhaur se dekh mirī samt na pahchān mujhe

nahīñ hai shahr meñ chehra koī tar o taaza
ajiib tarah kī ālūdgī havā meñ hai

vus.at-e-shahr-e-tañg-dil sarmā kī sub.h-e-sard meñ
jaagī hai Dar ke ḳhvāb se sūrat-e-faqīr ke sabab

koī to hogā jis ko mirā intizār hai
kahtā hai dil ke shahr-e-tamannā meñ le ke chal

charāġhoñ meñ añdherā hai añdhere meñ ujāle haiñ
hamāre shahr meñ kaalī havā ne par nikāle haiñ