Tags-Shahr

aalam tilism-e-shahr-e-ḳhamoshī hai sar-basar
yā maiñ ġharīb-e-kishvar-e-guft-o-shunūd thā

ik rasta us ke shahroñ kā ham us kī dhuul meñ dhuul hue
ik shahr us kī ummīdoñ kā aur ham sab is meñ rahte haiñ

ab to har shahar meñ us ke hī qasīde paḌhiye
vo jo pahle hī ḳhafā hai vo ḳhafā aur sahī

tū kho gayā hai mire shahr-e-raftagāñ lekin
ye ek dard kī ḳhushbū tirā surāġh to hai

kyā ḳhabar kis moḌ par bikhre matā-e-ehtiyāt
pattharoñ ke shahr meñ huuñ ā.īna oḌhe hue

har jagah har shahr har iqlīm meñ
dhuum hai us kī jo nā-maujūd hai

kyuuñ shahr-e-nigārāñ meñ
āġhāz pareshāñ thā

phir tirā shahr tirī rāhguzar ho ki na ho
aur ho bhī to mujhe shauq-e-safar ho ki na ho

maiñ ne mahsūs kiyā shahr ke hañgāme meñ
koī sahrā meñ hai, sahrā meñ bulātā hai mujhe

ḳhud-satā.ī se na ham baaz anā se aa.e
go tire shahr meñ jā kar ke bhī pyāse aa.e

sajda-bāzān-e-shahr pā.inda
dast-e-āzar kī aabrū hai vahī

kam nahīñ shor-e-nāla-o-fariyād
mātam-e-shahr aarzū hai vahī

havā.eñ shahr kī ālūda-e-kasāfat haiñ
ye sāf-suthrā-pan aur ye nafāsateñ jhūTī

'kausar' hai suḳhan-tāb mirā shahr-e-taḳhayyul
is shahr meñ haiñ aaj bhī ā.īna-gar ābād

der tak bhaTkā maiñ us ke shahr meñ
aur phir us kī galī kā ho gayā

is vaz-e-ehtiyāt kī zanjīr ke liye
maiñ ne bhī kī hai shahr meñ āvārgī bahut

hai jis kā taḳht sajda-gah-e-ḳhās-o-ām-e-shahr
maiñ us se milne ke liye be-kal nahīñ rahā

idhar na aao ab is shahar meñ ujāloñ ke
vo tīrgī hai ki din ko bhī raat samjhoge

ye shahr rahā hogā shā.ista mizājoñ kā
is shahr ke malbe se gul-dān nikalte haiñ

vahī darinda
mujhe jañgal se shahr le aayā