Tags-Shahr

bhaḌaktī aag to do chaar din meñ bujh ga.ī thī 'badr'
abhī tak shahr ke manzar na jaane kyuuñ dhuāñle haiñ

tire shahr kī sard galiyoñ kī aahaT
mire ḳhuun meñ sarsarā.ī

phir vahī maiñ huuñ vahī shahr-badar sannāTā
mujh ko Das le na kahīñ ḳhāk-basar sannāTā

kyā khule un pe ishq jo 'saifī'
shahr se dasht ko judā dekheñ

tamām shahr meñ aisā nahīñ ḳhulūs na ho
jahāñ umiid ho is kī vahāñ nahīñ miltā

shahr-e-gum-gashta kā vo katba jo hai gard-ālūd
har musāfir use jiine kī duā detā hai

kyuuñ chhoḌ deñ na shaam se pahle hī terā shahar
tujh se bichhaḌ ke raat basar kis liye kareñ

yaad sahrā kī hujūm-e-shahr meñ
zindagī kā ḳhvāb bīmāroñ ke beach

maiñ to ab shahr meñ kahīñ bhī nahīñ
kyā mirā naam bhī likhā hai kahīñ

amīr-e-shahr maiñ tujh ko tirī duhā.ī duuñ
ki merā tolā bhī terī nazar meñ māsha hai

shahr kī bhiiḌ meñ kyā ho isī ḳhātir 'āzar'
apnī pahchān ko ham ghar meñ hī chhoḌ aate haiñ

yuuñ chup hai shahr jaise ki kuchh bhī huā na ho
shāyad ab is ke ba.ad koī hādisa na ho

vo nahīñ to mirī nigāh meñ hai
baaġh vīrān aur shahr ujaaḌ

jitne the rañg husn-e-bayāñ ke bigaḌ ga.e
lafzoñ ke baaġh shahar kī sūrat ujaḌ ga.e

shahr par tūfān se pahle kā sannāTā hai aaj
hādisa hone ko hai yā sāneha Talne ko hai

lahū uchhalne kā shor jaise fazā meñ gūñjā kabhī nahīñ thā
ye hukm-e-shahr-e-sitamgarāñ hai na koī aahaT na koī halchal

kitne bedard haiñ is shahr ke rahne vaale
raah meñ chhīn ke dil kahte haiñ ghar jaate haiñ

ḳhurshīd na ho to shahr-e-dil meñ
parchhā.īñ sī koī shai na hogī

tumhāre shahr se sauġhāt aur kyā miltī
kisī se pyaas lī maiñ ne kisī se jaam liyā

havā hī aisī chalī hai har ek sochtā hai
tamām shahr jale ek merā ghar na jale