Tags-Shahr

fikr hai maah ke jo shahr-badar karne kī
hai sazā tujh pe ye gustāḳh nazar karne kī

kaun sā shahr-e-sabā fat.h kiyā chāhtā huuñ
log hairāñ haiñ mire kār-e-sulaimānī par

ajnabī shahar kī ajnabī shaam meñ
zindagī Dhal ga.ī malgajī shaam meñ

haiñ dasht ab ye jiite baste the shahr saare
vīrāna-e-kohan hai māmūra is jahāñ kā

nā-haq ye zulm karnā insāf kah piyāre
hai kaun sī jagah kā kis shahr kā kahāñ kā

aaseb nazar aate haiñ din ko bhī yahāñ par
is shahr meñ ab koī akelā na rahegā

pahle ik shahr tirī yaad se ābād kiyā
phir usī shahr ko mismār kiyā hai maiñ ne

ik harf mere naam se dīvār-e-shahr par
ye kyā huā ki raat meñ tahrīr ho gayā

ai mirī jān-e-ġhazal shahr-e-vafā-o-shauq meñ
merī azrā aur salmā merī nuurā aap haiñ

shahr-e-dil shahr-e-ḳhamoshāñ kī tarah hai gunjān
kitnā ābād magar shor-o-shaġhab kuchh bhī nahīñ

zindagī kī sā.ateñ raushan thiiñ sham.oñ kī tarah
jis tarah se shaam guzre jugnuoñ ke shahr meñ

har kisī aañkh kā badla huā manzar hogā
shahr-dar-shahr masīhāoñ kā lashkar hogā

phir siyāsat kī mahak aane lagī hai mujh ko
jaane ab kaun mire shahr meñ be-ghar hogā

shahr-e-ḳhūbāñ se jo ham ab bhī guzar aate haiñ
kitne dhundlā.e hue naqsh ubhar aate haiñ

ek muddat se haiñ is shahr meñ ham āvāra
bām-o-dar aaj bhī anjān nazar aate haiñ

maiñ phir rahā huuñ shahr meñ saḌkoñ pe ġhāliban
āvāz de ke mujh ko mirā ghar pukār le

is shahr meñ har shaḳhs ko sone kī paḌī hai
hālāñki batāyā bhī hai tūfān ke baare

nazar meñ us kī jo chaḌhtā hai so jiitā nahīñ bachtā
hamārā sāñvlā us shahr ke goroñ meñ kaalā hai

ho paa.e kisī ke ham bhī kahāñ yuuñ koī hamārā bhī na huā
kab Thahrī kisī ik par bhī nazar kyā chiiz hai shahr-e-ḳhūbāñ bhī

paanī aañkh meñ bhar kar laayā jā saktā hai
ab bhī jaltā shahr bachāyā jā saktā hai