Tags-Shahr

tumhārā shahr mire gaañv se hai kitnā alag
yahāñ guloñ kī jagah khilte haiñ shajar meñ charāġh

marsiye dil ke ka.ī kah ke diye logoñ ko
shahr-e-dillī meñ hai sab paas nishānī us kī

dil ko thī ek shahr-e-tamannā kī justujū
lekin ham aarzū ke ḳharāboñ meñ kho ga.e

ḳhudā āzād thā hākim kī had se
ḳhudā ke shahr meñ sarkār kyuuñ hai

jis shahr meñ gumrāhī azīz-e-dil-o-jāñ ho
us shahr-e-malāmat meñ ḳhizar kyuuñ nahīñ jaate

tere hī misr kā malāl tere hī najd kā ḳhayāl
shahr-ba-shahr kū-ba-kū gām-ba-gām thā mujhe

vo mere shahr meñ aayā huā hai
kaḌaktī dhuup meñ saayā huā hai

terā vajūd biitī huī zindagī kī yaad
tū aa chuke to shahr meñ dhūmeñ machā.eñ ham

is shahr-e-ḳhāmushī meñ koī jāgtā bhī ho
'shahzād' kis ko sub.h kā muzhda sunā.eñ ham

shorīdgī ko haiñ sabhī āsūdgī nasīb
vo shahr meñ hai kyā jo bayābān meñ nahīñ

amīr-e-shahr ko paiġhām mil bhī jaa.e to
ġharīb-e-shahr kā koī na aasrā hogā

talḳhiyāñ niim ke pattoñ kī milī haiñ har sū
ye mirā shahr kisī phuul kī ḳhushbū bhī nahīñ

ab is se pahle ki rusvā.ī apne ghar aatī
tumhāre shahr se ham bā-adab nikal aa.e

tum ḳhalvat-e-ġham se niklo to is shahr meñ aise log bhī haiñ
ik baar jo un ko dekhoge to dekhte hī rah jāoge

arzāñ-farosh par nahīñ uThtī nazar koī
rahtī hai bhiiḌ shahr kī mahñgī dukān par

aaj mahsūr haiñ dīmak-zada dīvāroñ meñ
ham bhī shāmil the kabhī shahr ke memāroñ meñ

kab sahar phūTegī koī tire zindānoñ se
kab rihā.ī mirī ai shahr-e-aziyyat hogī

ajnabī chehre takte rahnā shahr kī chaltī rāhoñ par
apnī samajh meñ ab aayā hai ye pahlū tanhā.ī kā

qissa-e-shauq ko us tishna-labī kā likhnā
kar ke ik aur safar shahr-e-hunar kī jānib

dillī jo ek shahr thā aalam meñ intiḳhāb
rahte the muntaḳhab hī jahāñ rozgār ke