Tags-Shahr

jab se paanī marā hai āñkhoñ kā
shahr ke shahr jal ga.e har-sū

maut ke dasht-e-be-kanār meñ gum
shahr ke hādsāt meñ tanhā

jazba-e-ābād-kārī lā.eq-e-tahsīñ magar
pattharoñ ke shahr meñ shīshoñ ke ghar kyā kījiye

nikal kar kabhī sahr-e-sūd-o-ziyāñ se
mohabbat ke ujḌe dayāroñ ko dekho

kashīd-e-mai pe hai kaisā fasād hākim-e-shahr
tirī girah se hai kyā banda-e-ḳhudā jaatā

jo aag bujh na sakegī usī ke dāman meñ
har ek shahr hai ījād kā basā jaatā

tumheñ be-maqām rafāqatoñ kī talāsh hai
mirā shahr shahr-e-sabāt hai yahāñ aao mat

jaane kyā baat huī shahr-e-nigār-e-jāñ meñ
aaj kyuuñ ajnabī lagtā hai shanāsā chehra

ye shahr aaj ashkoñ meñ Duubā huā hai
yahāñ se vahāñ tak

huī bārish-e-sañg us shahr meñ
hameñ bhī milā haqq-e-ham-sā.egī

karne aatī hai munavvar dil har gosha-e-dard
chāñdnī shahar kī galiyoñ meñ bhaTak jaatī hai

vo hai kis des meñ kis shahr meñ huuñ maiñ 'jamshed'
bas isī soch meñ har raat guzar jaatī hai

jise samajhte haiñ shā.irī ham safar musalsal hai ḳhushbuoñ kā
ġhazal kī shāḳhoñ pe ḳhūbsūrat jo shahr mahke to log samjhe

ek añgḌā.ī se saare shahr ko niiñd aa ga.ī
ye tamāshā maiñ ne dekhā baam par hotā huā

ujḌe hazār shahr 'hasan' aur phir base
ābād par huā na ye dil kā nagar hanūz

ham ko aapas meñ mohabbat nahīñ karne dete
ik yahī aib hai is shahr ke dānāoñ meñ

lams aahaT ke havāoñ ke nishāñ kuchh bhī nahīñ
ḳhvāb hī ḳhvāb hai ye shahr yahāñ kuchh bhī nahīñ

rishvateñ rahzanī Dakaitī qatl
lag ga.ī shahr ko havā kaisī

ġhalat kahā thā kisī ne ye gaañv vāloñ se
chalo ki shahr meñ ḳhairāt baT rahī hogī

kisī hasīna-e-bilqīs-adā kī ḳhātir ham
nigār-ḳhāna-e-shahr-e-sabā banāte haiñ