Tags-Shahr

shorīdgī ko haiñ sabhī āsūdgī nasīb
vo shahr meñ hai kyā jo bayābān meñ nahīñ

bastī se duur jā ke koī ro rahā hai kyuuñ
aur pūchhtā hai shahr tirā so rahā hai kyuuñ

kabhī kabhī to darindoñ pe pyaar aatā hai
tamām shahr kī yuuñ dekh-bhāl karte haiñ

shahr meñ charchā hai āḳhir aisī laḌkī kaun hai
jis ne achchhe-ḳhāse ik shā.ir ko pāgal kar diyā

tamām raat nahāyā thā shahr bārish meñ
vo rañg utar hī ga.e jo utarne vaale the

ham ne maanā ki tire shahr meñ sab achchhā hai
koī iisā ho to mil jā.eñge bīmār bahut

isī māmūra-e-ḳhvābīdgāñ shahr-e-ḳhamoshāñ meñ
na jaane zindagī kā svāñg kab se bhar rahā huuñ maiñ

hujūm-e-shahr-e-ḳhirad meñ bhī ham se ahl-e-junūñ
alag dikheñge, garebāñ jo hoñ sile hue bhī

mirī tasvīr kī āñkhoñ meñ basā hai ik shahr
is meñ haiñ ūñche mahal jo maiñ banā saktā thā

ajab gumān the qaus-e-nigāh meñ us kī
khañDar se shahr ko is ne khañDar nahīñ likkhā

na.ī na.ī āñkheñ hoñ to har manzar achchhā lagtā hai
kuchh din shahr meñ ghūme lekin ab ghar achchhā lagtā hai

sab se kamzor akele ham the
ham pe the shahr ke saare bohtān

kyā ajab shahr-e-ġhazal hai 'bānī'
lafz shaitān suḳhan be-īmān

dar-o-dīvār bhī dete haiñ havāla merā
kaise mumkin huā is shahr meñ charchā merā

zalzaloñ ne kiyā yuuñ shahr ko mismār ki bas
chīḳh uThe ḳhauf se bām-o-dar-o-dīvār ki bas

shahr-e-taḳhrīb meñ kyā ḳhvāhish ta.amīr kareñ
aise tārāj hue kūcha-o-bāzār ki bas

na.e ik shahr ko sub.h-e-safar kyā le chalī mujh ko
sadā.eñ de rahī hai ek chhoTī sī galī mujh ko

shahr ho yā ho bayābāñ ghar ho yā koī khañDar
silsila chāroñ taraf ġhūl-e-bayābānī kā hai

jā paḌe chup ho ke jab shahr-e-ḳhamoshāñ meñ 'nazīr'
ye ġhazal ye reḳhta ye sher-ḳhvānī phir kahāñ

use bhī ab ke bahut ranj-e-nārsā.ī hai
khaḌī hai shahr kī sarhad ke paas tanhā.ī