Tags-Shahr

ik shahr-e-sadā siine meñ ābād hai lekin
ik ālam-e-ḳhāmosh hai jis samt nazar jaa.e

badal saktā thā mere shahr kā āhañg 'sājid'
agar tartīb pā saktā kabhī sāzīna merā

ye kaisā shahr hai maiñ kis ajā.ib-ghar meñ rahtā huuñ
maiñ kis kī aañkh kā paanī huuñ kis patthar meñ rahtā huuñ

aaj chalo āvāra phireñ ham shahr meñ galiyoñ galiyoñ
'ramz' ho kuchh tum bhī man-maujī ham bhī haiñ sailānī

aap Darte haiñ ki khul jaa.e na aslī chehra
is liye shahr ko ā.īna banāne na diyā

baune hamāre shahr ke bechain haiñ bahut
in ko tamām shahr kī ūñchā.ī chāhiye

sūraj kī tez dhuup kī zad meñ hai ab ye shahr
mausam kī ik hasīn sī añgḌā.ī chāhiye

ishq ko zid hai ki ta.amīr kare shahr-e-umīd
husn kam-baḳht bad-andesh huā chāhtā hai

zindābād ai dasht ke manzar zindābād
shahr meñ hai jaltā huā har ghar zindābād

tamām shahr hī jis kī talāsh meñ gum thā
maiñ us ke ghar kā pata kis se pūchhtā yaaro

hādse jin par mo.arriḳh kī zabāñ khultī nahīñ
shahr kī dīvār par ham ḳhuun se likhte rahe

shahr-e-ulfat meñ diyā koī jalāte jaate
mere kūche ke añdhere bhī miTāte jaate

ḳhaak hī shahr-o-bayābāñ kī agar daulat hai
to ye āvāra tirā sāhab-e-sarvat hai bahut

DhūñD kuchh log muqābil huuñ jahāñ maiñ tere
shar-e-nāqis meñ kahāñ ham se haiñ ġham-ḳhvār miyāñ

hudūd-e-shahr se bāhar bhī bastiyāñ phailīñ
simaT ke rah ga.e yuuñ jañgaloñ ke ghere bhī

ruuh ke dasht meñ ik ho kā samāñ hai ai 'shāz'
de gayā kaun bhare shahr meñ ban-bās mujhe

shahr meñ log jise DhūñDte haiñ
apne ghar meñ use baiThā dekhūñ

bāñTne niklā hai vo phūloñ ke tohfe shahr meñ
is ḳhabar par ham ne bhī gul-dān ḳhālī kar diyā

le gayā vo saath apne dil kī saarī raunaqeñ
kis qadar ye shahr thā gunjān ḳhālī kar diyā

tamām shahr añdheroñ meñ Duub jā.egā
havā ko ek hī us ne ishāra karnā hai