Tags-Shahr

hāsil-e-ehsās hai ik umr kī tishna-labī
abr kā TukḌā bhī koī shahr par barsā nahīñ

is shahr-e-ḳharābī meñ ġham-e-ishq ke maare
zinda haiñ yahī baat baḌī baat hai pyāre

apnī aadat ki sab se sab kah deñ
shahr kā hai mizāj sannāTā

kabhī kaise ho 'safī' pūchh to letā koī
dil-dahī kā magar is shahr meñ dastūr nahīñ

ye shahr-e-zāt bahut hai agar banāyā jaa.e
to kā.enāt ko kyuuñ dard-e-sar banāyā jaa.e

sahmā hai āsmān zamīñ bhī udaas hai
har gaañv aur shahr meñ ḳhauf-o-hirās hai

kal 'farāsat' thā yahāñ majma-e-yārāñ tire saath
ab isī shahr meñ tanhā.ī ke āzār uThā

ho gayā huuñ har taraf bad-nām tere shahr meñ
ye milā hai pyaar kā in.aam tere shahr meñ

jab sunahrī chūḌiyāñ bajtī haiñ dil ke saaz par
nāchtī hai gardish-e-ayyām tere shahr meñ

is qadar pābandiyāñ āḳhir ye kyā andher hai
le nahīñ sakte tirā hī naam tere shahr meñ

ab to yādoñ ke ufuq par chāñd ban kar muskurā
rote rote ho ga.ī hai shaam tere shahr meñ

kab khulegā tere mai-ḳhāne kā dar mere liye
phir rahā huuñ le ke ḳhālī jaam tere shahr meñ

ek dīvāne ne kar lī ḳhud-kushī pichhle pahar
aa gayā āḳhir use ārām tere shahr meñ

'prem' yūsuf to nahīñ lekin ba-andāz-e-digar
ho chukā hai bār-hā nīlām tere shahr meñ

sach bolnā chāheñ bhī to bolā nahīñ jaatā
jhūToñ ke liye shahr bhī chhoḌā nahīñ jaatā

ḳhamosh shahr kī sunsān sard rātoñ meñ
tumhārī yaad mire saath shab guzārtī hai

yahī hai dastūr-e-shahr-e-hastī ki jo nayā hai vahī purānā
hayāt añgḌā.ī le rahī hai zamāna karvaT badal rahā hai

amīr-e-shahr tirī tarah qīmtī poshāk
mirī galī meñ bhikārī pahan ke aate haiñ

sunte haiñ bayābāñ bhī kabhī shahr rahā thā
so shahr bhī ik roz bayābān rahegā

ek akelā kuchh bhī bole kaun shahr meñ us kī suntā
peḌ pe ek akelī bulbul jañgal meñ ras ghol rahī hai