Tags-Shahr

nazar aatī nahīñ saḌkoñ pe lāsheñ
amīr-e-shahr andhā ho gayā hai

itnā bhī sañg-e-malāmat se Darā mat nāseh
sar salāmat hai to is shahr kā pherā hogā

dekhe hue se lagte haiñ raste makāñ makīñ
jis shahr meñ bhaTak ke jidhar jaa.e aadmī

kah ke ye mujh se ki is shahr meñ ho tum kab se
iiñT sar par kisī ne jaise ki de maarī hai

maiñ tire shahr meñ tanhā huuñ na jaane kab se
tū na hotā tirī dīvār kā saayā hotā

ab maiñ chaltā huuñ chal ḳhudā-hāfiz
shahr ye vo nahīñ rahā jānāñ

merā sarmāya to bas manzar-e-be-manzarī hai
shahr-e-be-aks kā ik ā.īna-bardār huuñ maiñ

jis shahr-e-ārzū ke nishānāt miT ga.e
dil kī nigāh phir vahīñ jaatī hai aaj bhī

mil hī jā.egā kabhī dil ko yaqīñ rahtā hai
vo isī shahr kī galiyoñ meñ kahīñ rahtā hai

vahī shahr hai shahr ke log vahī ġham-e-ḳhanda o sañg o salīb vahī
yahāñ aa.e haiñ kaun se aise saḳhī ki jo lutf-e-suḳhan kā savāl kareñ

ye shahr āfatoñ se to ḳhālī koī na thā
jab ham saḳhī hue to savālī koī na thā

har ek shahr meñ tanhā galī galī tanhā
maiñ phir rahā huuñ tire ġham kī laash uThā.e hue

dil kā nagar to der se vīrān thā magar
sūraj kā shahr bhī mujhe ujḌā huā lagā

kaḌaktī dhuup meñ dasht-e-safar se ghabrā kar
fasīl-e-shahr ke saa.e meñ aa ke baiTh rahe

amīr-e-shahr kyā jaane jo guzrī hai ġharīboñ par
yahāñ par ġham ke phere haiñ vahāñ har baar ḳhushiyāñ haiñ

kyā kyā dhare ajūbe haiñ shahr-e-ḳhayāl meñ
biite ḳhushī se din to kaTe shab malāl meñ

aTā hai shahar bārūdī dhueñ se
saḌak par chand bachche ro rahe haiñ

rāhib apnī zaat meñ shahr ābād kareñ
dair ke bāhar pahra hai vīrāne kā

shahr ke hākim kā ye farmān hai
qaid meñ kahlā.eñge āzād sab

husn thā us shahr kā āvārgī
aur hameñ the paañv ke chhāle aziiz