Tags-Shahr

kuchh aisā lagtā hai jis ne bhī Diary likhī hai
vo shahr aayā hai gaañv meñ chhoḌ kar kisī ko

''koī nahīñ aa.egā ye kiiḌe nikālne ab
ki un ko to shahr meñ dhuāñ de ke maarā jaatā hai nāliyoñ meñ''

tujh ko milne se rahā shahr meñ vahshat kā ilaaj
tujh ko shāyad ki shifā baḳhshe havā sahrā kī

terā ham-zād tujhe shahr meñ milne se rahā
bāñdh le raḳht-e-safar ḳhaak uḌā sahrā kī

palaT ke aa.ī hai maqtal meñ zindagī 'rāhat'
faqīh-e-shahr ko ab intizār kis kā hai

sunā gayā hai yahāñ shahr bas rahā thā koī
kahā gayā hai yahāñ par makān hote the

khulī chhatoñ pe dupaTTe havā meñ uḌte nahīñ
tumhāre shahr meñ kyā āsmān bhī kam hai

ye kohar kohar se chehre dhuāñ dhuāñ āvāz
tumhāre shahr meñ shāyad abhī nayā huuñ maiñ

go sab ko baham sāġhar o baada to nahīñ thā
ye shahr udaas itnā ziyāda to nahīñ thā

tumhāre shahr meñ pāgal vo haiñ jo hañste haiñ
hamāre shahr meñ saare udaas pāgal haiñ

ye kaun aag lagāne pe hai yahāñ māmūr
ye kaun shahr ko maqtal banāne vaalā hai

utrā hai 'samad' shahr pe vo rañg-e-takalluf
fan ko bhī ta.alluq nahīñ be-sāḳhta-pan se

vo shahr meñ karte haiñ añdheroñ kī tijārat
maiñ zulm kī bastī kā ujālā huuñ burā huuñ

sūd-o-ziyāñ par shahr-e-sitam ke kyā hairat
ġhāsib kī jhūTī ta.azīreñ paḌh lenā

vahī shahr hai vahī rāste vahī ghar hai aur vahī lawn bhī
magar is darīche se pūchhnā vo daraḳht anaar kā kyā huā

shahar kī battiyāñ na gul kar de
raat pichhle pahar tirā milnā

kyā shahr meñ hai garmi-e-bāzār ke sivā
sab ajnabī haiñ ek dil-e-zār ke sivā

tā-shahr-e-adam ham ko mushkil nazar aatā hai
ālā.ish-e-hastī se be-lāg chale jaanā

hamāre shahr mohalle galī kā ab māhaul
bigaḌ gayā to banāne meñ der lagtī hai

maiñ koī shahr huuñ sadiyoñ purānā
hazāroñ baar ujḌā huuñ basā huuñ