Tags-Shahr

'farhat-ehsās' kabhī ghar se nikaltā hī nahīñ
shahr vaale use bas naam se pahchānte haiñ

raas aa.e na us ke rasm-o-rivāj
shahr ham se ḳhafā ḳhafā sā thā

ab ke Thahrā.ī hai ham ne bhī yahī shart-e-vafā
jo bhī is shahr meñ aa.e vo sitam-gar ho jaa.e

azhdahā pāniyoñ kā shahr-e-navā TuuT gayā
mātamī aañkh meñ aañsū mire be-āb bhī the

āb-e-siyāh pher do bāb-e-vafā ke naqsh par
shahr-e-anā meñ jab kabhī qissa-e-dīgarāñ kaho

fasādī the mire hī ghar meñ 'anjum'
maiñ un ko shahr bhar meñ DhūñDhtā thā

bahut dinoñ ke ba.ad
is shahr meñ bhaTkā huā

tamām-shahr thā munkir tire ta.alluq se
ġharīb-e-shahr tujhe ham ne āshnā to kahā

mujh ko apne hī shahr kā yaaro
raas aayā nahīñ havā paanī

ye shahr-e-shīshagarāñ hai to phir yahīñ pe kahīñ
kisī kī jeb se patthar zarūr niklegā

shahr jānāñ meñ nahīñ pūchhne vaalā koī
kaun ho aa.e ho kyuuñ tum yahāñ kyā bhuul ga.e

ye shahr nazar aatā hai ham-zād hamārā
aur gard nazar aatī hai fariyād hamārī

ye ḳhud-kalāmī ye be-niyāzī ye shahr vāloñ se duur rahnā
amānateñ 'āzmī' yaqīnan kisī ġham-e-lā-zavāl kī haiñ

ajab tilism thā us shahr meñ bhī ai logo
palak jhapakte hī apnā jo thā parāyā thā

bharā hai shahr firaunoñ se apnā
koī hotā jo ik muusā nahīñ hai

hai aur hī kuchh āb-o-havā shahr-e-adam kī
har shaḳhs jo 'bedār' udhar ko safarī hai

rahīn-e-vaz-e-buzurgāñ hai apnā dil ya.anī
tire hī shahr meñ tujh se hazār guzre haiñ

kyā baat huī kyuuñ shahr jalā ab is ke sivā kuchh yaad nahīñ
ik fard sarāpā aag huā pal-bhar meñ huā ik fard havā

yā ghar se qadam merā bāhar na nikaltā thā
yā shahr kī galiyoñ meñ rusvā.ī hai aur maiñ huuñ