Tags-Shahr

'ābid' tamām shahr pe aalam hai kaun sā
har ek shakl naqsh-ba-dīvār sī lage

ai shahr-e-sitam-pesha batā kis ko sadā duuñ
ab kaun rahā hai jise paiġhām-e-vafā duuñ

shahr kā shahr agar aa.e bhī samjhāne ko
is se kyā farq paḌegā tire dīvāne ko

musāfiroñ sā kabhī jab maiñ shahr se guzrā
to rāstoñ meñ ka.ī rāste the banjar se

shahr-e-tamannā meñ jā kar
kitne phuul khilātī huuñ

apnī tash.hīr kare yā mujhe rusvā dekhe
vo mire vāste is shahr meñ kyā kyā dekhe

us ke dar se jo uThe shahr se phir kyā matlab
kisī sahrā meñ hī ab naql-e-makāñ Thahregī

koī ġhamgīñ koī ḳhush ho kar sadā detā rahā
raat shahr-e-dil kā har manzar sadā detā rahā

nashsha-e-sahrā-navardī meñ tujhe kab hosh thā
tujh ko shahr-e-gul kā ik ik ghar sadā detā rahā

ghar ke dukhḌe shahr ke ġham aur des bides kī chintā.eñ
in meñ kuchh āvāra kutte haiñ kuchh ham ne paale haiñ

ek usī ko dekh na paa.e varna shahr kī saḌkoñ par
achchhī achchhī poshākeñ haiñ achchhī sūrat vaale haiñ

maqsad-e-zīst ġham-e-ishq hai sahrā ho ki shahr
baiTh jā.eñge jahāñ chāho biThā do ham ko

aadmī kam-go hai aur ghar se nikaltā bhī nahīñ
shahr meñ phir bhī 'munavār' kis qadar mash.hūr hai

mutma.in hotā kahāñ merā dil-e-jalvat-pasand
darmiyān-e-shahr bhī jañgal sī tanhā.ī milī

jab bhī habs-e-shahr se nikle to har ik raah par
mehrbāñ ahbāb kī mānind purvā.ī milī

hamāre shahr kā mard-e-subuk-sar
kulāh-e-ḳhusravāna māñgtā hai

na dekhā hai jis ne kabhī apnā chehra
vahī shahr meñ ā.īna bāñTtā hai

shahr-āshob meñ aañsū kī tarah phirte haiñ
haa.e vo log kisī ḳhvāb ke paale hue log

shahr meñ jo nazar paḌā us kā
kushta-e-nāz yā taġhāful thā

ba-zāhir rañg ḳhushbū raushnī yak-jān hote haiñ
magar ye shahr andar se bahut vīrān hote haiñ