Tags-Shahr

ajab bechainiyāñ phailī huī haiñ
ki shab bhar shahr saarā jāgtā hai

sach kahne kā hausla tum ne chhīn liyā hai varna
shahr meñ phailī vīrānī ko sab vīrānī kahte

tumhīñ batāo yahāñ kis tarah ji.eñ ham log
tumhāre shahar meñ ġhazloñ kī ik dukāñ bhī nahīñ

chalo is marhale par hī koī tadbīr kar dekho
vagarna shahr meñ paanī to dāḳhil hone vaalā hai

hujūm-e-shahr ke sannāTe meñ gum-sum vo Tiila sā
usī ko aate jaate be-zarūrat dekhte rahnā

guzishta roz o shab se aaj bhī ik rabt sā kuchh hai
vagarna shahr bhar meñ maarā maarā phir rahā hotā

sunā.ī detī hai har samt se naved-e-baqā
amīr-e-shahr ki jab log marnā chāhte haiñ

is shahr meñ to kuchh nahīñ rusvā.ī ke sivā
ai 'dil' ye ishq le ke kidhar aa gayā tujhe

bastī meñ ġharīboñ kī jahāñ aag lagī thī
sunte haiñ vahāñ ek nayā shahr basegā

ham pe hī ḳhaas haiñ kuchh us kī ināyāt so ab
fitna is shahr meñ har roz nayā jāgtā hai

go shahr-e-ḳhuftgāñ meñ qayāmat kā ran paḌā
talvār phir bhī niklī na koī niyām se

shahr kī āb-o-havā ne mire bachche chhīne
maiñ akelā hī rahā gaañv ke pīpal kī tarah

sub.h kaisī hai vahāñ shaam kī rañgat kyā hai
ab tire shahr meñ hālāt kī sūrat kyā hai

faqīh-e-shahr se rishta banā.e rahtā huuñ
sharīf ghar kā huuñ izzat bachā.e rahtā huuñ

amīr-e-shahr sabhī the sharīk-e-mashq-e-sitam
kisī ne kam to kisī ne sitam ziyāda kiyā

ai shahr-e-ḳhirad kī taaza havā vahshat kā koī in.aam chale
kuchh harf-e-malāmat aur chaleñ kuchh vird-e-zabāñ dushnām chale

nahr is shahr kī bhī bahut mehrbāñ hai magar apnā rahvār mat roknā
hijratoñ ke muqaddar meñ baaqī nahīñ ab koī qarya-e-mo'tabar yā aḳhī

ḳhaas bandoñ ko pukāregā idhar to rizvāñ
dāvat-e-ām idhar shahr-e-butāñ detā hai

hijr ke shahr meñ gulzār kahāñ milte haiñ
sub.h ko dasht samajh shaam ko vīrāna samajh

tere shahr se ho kar aa.ī tez havā
phir dil kī buniyād hilā kar baiTh ga.ī