Tags-Shahr

samajhte kyā ho ham ko shahr vaalo
bayābāñ meñ bhī ghar rakkhā huā hai

shahr ko saare logoñ meñ taqsīm kar duuñ magar
chand galiyāñ maiñ apnī sadā ke liye chhoḌ duuñ

mujhī se kyuuñ hai ḳhafā merā ā.īna 'maḳhmūr'
is andhe shahr meñ kyā ḳhud-nigar maiñ tanhā huuñ

shahr meñ ham ne sunā hai ki tire shola-navā
kuchh sulagte hue naġhmāt liye phirte haiñ

ahl-e-duniyā ke liye ye mājrā hai muḳhtalif
pattharoñ ke shahr meñ ek aa.ina hai muḳhtalif

agarche shahr ke hālāt pur-sukūn bhī haiñ
har ek chehra magar zard zard ab tak hai

kyā kyā na ghar jamāl ke ābād the yahāñ
kis dukh se shahr-e-vīrāñ ke āsār bolte

jis kā haq thā ki bane sañg-e-malāmat kā hadaf
zahe taz.hīk vo ab shahr meñ rusvā bhī nahīñ

kis jagah kaun gaḌā hai mujhe ma.alūm hai sab
is tire shahr kā naqsha mirā dekhā huā hai

matā-e-hosh yahāñ sab ne bech Daalī hai
tumhāre shahr kī tahzīb hī nirālī hai

na jaane bazm se kis ko uThā diyā tum ne
tamām shahr-e-vafā aaj ḳhālī ḳhālī hai

kisī kī sham.eñ sar-e-shām bujh ga.iiñ 'nayyar'
kisī ke shahr meñ lekin abhī dīvālī hai

ye to mere ḳhvāb nahīñ haiñ ye to merā shahr nahīñ
kis jānib se aa niklī haiñ ye gahnātī do-pahreñ

agarche kam na thii, chāragarān-e-shahr kī pursish
magar! kuchh zaḳhm-e-nā-dīda bahut gahre nikal aa.e

kah rahī hai shahar kī barbādiyoñ kī dāstāñ
adh-jale kuchh kāġhazoñ meñ ik kahānī kī kitāb

rāste dhuup se pighle hī chale jaate haiñ
aap bādal haiñ to phir shahr pe saayā kiije

jā chukā shahr se vo apnī udāsī le kar
umr bhar ab dar-o-dīvār sajāyā kiije

shahr meñ us ke naam ke jitne shaḳhs the sab hī achchhe the
sub.h-e-safar to dhund bahut thī dhūpeñ ban kar niklī meñ

us ke āñgan meñ khultā thā shahr-e-murād kā darvāza
kueñ ke paas se ḳhālī gāgar haath meñ le kar palTī maiñ

kaash bādal kī tarah pyaar kā saayā hotā
phir maiñ din raat tire shahr pe chhāyā hotā