Tags-Shahr

shu.ūr shahr ke hālāt kā nahīñ sab ko
bayān shahr ke hālāt kā zarūrī hai

dekhte jaao zarā shahr-e-ḳhamoshāñ kā samāñ
ki zamāna yahāñ ḳhāmosh nazar aatā hai

kabhī shahr-e-husn-e-ḳhayāl se kabhī dasht-e-huzn-o-malāl se
tire ishq meñ tere pyaar meñ maiñ kahāñ kahāñ se guzar gayā

vo apne shahr ke miTte hue kirdār par chup thā
ajab ik lāpata zaat us ke apne sar pe rakkhī thī

raste meñ qadam phūñk ke rakhnā mere pyāro
haiñ chāroñ taraf shahr meñ bikhrī huī āñkheñ

jhuuT hoñToñ pe bilā-ḳhauf-o-ḳhatar aayā hai
muddatoñ shahr meñ rah kar ye hunar aayā hai

shahr se lauT to aayā hai magar lagtā hai
terā 'ḳhālid' kisī tūfāñ se guzar aayā hai

sā.at-e-shām-e-ġham-e-hijr kā sannāTā hai
shahr-e-auhām ko sapnoñ se sajāyā jaa.e

jiddat-e-vahshat-e-sahrā ke liye lāzim hai
dasht ke beach ab ik shahr basāyā jaa.e

ġhārat-garī-e-shahr meñ shāmil hai kaun kaun
ye baat ahl-e-shahr pe khul bhī ga.ī to kyā

maiñ bhī shahr-e-vafā meñ nau-vārid
vo bhī ruk ruk ke chal rahī hai abhī

zamīñ se tā-falak chhā.ī huī hai raushnī-e-lā
ye saarā shahr hai merī nazar meñ aañkh kā dhokā

use meñ DhūñDhtā thā raat kī gahrī ḳhamoshī meñ
na jaane kis tarah phir shahr meñ merā huā charchā

is shahr-e-ḳhisht-o-sañg ko shīshe kī chaah hai
koī javān ā.īna-bardār chāhiye

kyā pattharoñ ke shahr meñ dūkān-e-shīsha-gar
ik sham.a jal rahī hai ġhazab kī havā ke saath

amīr-e-shahr ko bhī qatl kar gayā 'tāriq'
farāz-e-dār pe aa ke ye muskurānā mirā

butān-e-ḳhisht-o-sañg se kalām kar ke aa gayā
ki maiñ tumhāre shahr meñ bhī shaam kar ke aa gayā

vo āsmāñ hai to ho maiñ zamīn huuñ ḳhush huuñ
anā ke shahr meñ jab se makīn huuñ ḳhush huuñ

ab guzāra ġhair-mumkin shahr meñ hairat jahāñ
zehn-o-dil patthar ke tan patthar kā ghar patthar kā hai

dard-e-dil ko dāstāñ-dar-dāstāñ hone to do
shahr-e-qātil meñ zarā amn-o-amāñ hone to do