Tags-Shahr

kare kaun phūloñ ke mausam kā zikr
agar shahr meñ aks-e-ḳhushbū mare

sulaimān-e-suḳhan to ḳhair kyā huuñ
yake az shahr-e-yārān-e-sabā huuñ

tum na aa.e kabhī nazdīk to achchhā hī kyā
log nādāñ haiñ yūñhī shahr meñ charchā hotā

tiir aayā thā jidhar ye mire shahr ke log
kitne saadā haiñ ki marham bhī vahīñ dekhte haiñ

aaj phir shahr ke kūche nazar aate haiñ udaas
kis taraf le ga.ī vahshat tire dīvāne ko

ham ne dekhā hai dariyāoñ kā ruḳh kuñvar shahr kī samt hai
shahr vaale agar be-ḳhabar haiñ to kyā be-ḳhabar chhoḌ deñ

dil thā ki ḳhush-ḳhayāl tujhe dekh kar huā
ye shahr be-misāl tujhe dekh kar huā

apne ḳhilāf shahr ke andhe hujūm meñ
dil ko bahut malāl tujhe dekh kar huā

bichhḌe to jaise zehn muattal sā ho gayā
shahr-e-suḳhan bahāl tujhe dekh kar huā

sharm aatī hai ki us shahr meñ ham haiñ ki jahāñ
na mile bhiik to lākhoñ kā guzārā hī na ho

Dar gayā dekh ke maiñ shahr-e-muhazzab kā chalan
kitne aaseb fasādāt meñ ghar se nikle

maiñ shahr-o-bayābāñ meñ tujhe DhūñD chukā huuñ
be-dard to kis hujla-e-pinhāñ meñ chhupā hai

kyuuñ jaage hue shahr meñ tanhā hai har ik shaḳhs
ye raushnī kaisī hai ki saaya bhī judā hai

merī fariyād koī na.iiñ suntā
koī is shahr meñ bhī bastā hai

udaas udaas haiñ insāñ har ek chehra faq
ye shahr shahr hai yā dasht hai ye laq-o-daq

tamām shahr ġharq hai ġhubār hī ġhubār meñ
amīr-e-shahr ye batā vo ḳhāksār kaun thā

thī be-hayā.īyoñ kī dhuum shahr-e-imtiyāz meñ
bigaḌ chuke samāj kā javāb-dār kaun thā

kartā thā shahr meñ jo mohabbat se guftugū
ma.alūm hai kisī ko vo pāgal kahāñ gayā

tumhāre shahr kā insāf hai ajab insāf
idhar nigāh udhar zindagī badaltī hai

ek dushnām hai ye tarz-e-ta.āruf mujh ko
yaaro is shahr kā derīna shanāsā huuñ maiñ