Tags-Shahr

yahāñ taaj us ke sar par hogā jo taḌke shahr meñ dāḳhil ho
yahāñ saaya humā kā nahīñ paḌtā yahāñ koh-qāf nahīñ hotā

luuTā hai jis ne shahr ke sabr-o-qarār ko
vo shaḳhs mere shahr kā pardhān ho gayā

jalte-bujhte hue is shahr pe kyā kuchh likkhā
aaj sab likkhā huā aañkh pe lā kar rakh deñ

lahū mahkā to saarā shahr pāgal ho gayā hai
maiñ kis saf se uThūñ kis ke liye ḳhanjar nikālūñ

aa.ī shab-e-siyah to diye jhilmilā uThe
thā raushnī meñ shahr hamārā bujhā huā

had hai usī ke paas hai kirdār kī sanad
jis kī tamām shahr meñ izzat kabhī na thī

lagtā hai vo shahr ab kisī āseb-zada sā
kyā jis ke liye jashn sā barpā thā vo tum the

shahr badlā huā sā lagtā hai
har koī uuprā sā lagtā hai

marsiya apnā sunā.ūñ shahr-e-nā-pursāñ ke beach
pattharoñ se aur kyā ummīd-e-ġham-ḳhvārī karūñ

dil ke rahne ke liye shahr-e-ḳhayālāt nahīñ
sar-ba-sar hai nafī is meñ kahīñ isbāt nahīñ

jab bhī ġharīb-e-shahr se kuchh guftugū huī
lahje havā-e-shām ke namnāk ho ga.e

dil-e-gamīñ se bhī jalte haiñ shādmān-e-hayāt
usī charāġh kī ab shahr meñ havā sī hai

tumhāre shahr se jaanā muqaddar thā so jhelā hai
magar is meñ raqīboñ kī duā.eñ nā-munāsib haiñ

amīr-e-shahr ke tāqoñ meñ jalne vaale charāġh
ujāle kitne gharoñ ke sameT laate haiñ

diye ab shahr meñ raushan nahīñ haiñ
havā kī hukmarānī ho ga.ī kyā

is shahr ke log ajiib se haiñ ab sab hī tumhāre asiir hue
jab jaañ pe baraste the patthar us vaqt hamīñ dil-gīr hue

kuchh shahr tumhārā tañg bhī thā kuchh tum bhī the kamzor zarā
patthar kī nigāhoñ ke Dar se tum apne hī ghar meñ asiir hue

vārdāteñ to ka.ī shahr meñ guzrī hoñgī
aaj aḳhbār meñ merī bhī ḳhabar rakh denā

abhī haiñ kuchh purānī yādgāreñ
tum aanā shahr merā dekhne ko

farishtoñ meñ bhī jis ke tazkire haiñ
vo tere shahr meñ rusvā bahut hai