Tags-Shahr

yād-e-ayyām ki yaañ tark-e-shakebā.ī thā
har galī shahr kī yaañ kūcha-e-rusvā.ī thā

milā ashk-o-lahū kī namī ko aapas meñ
sarāb shahr meñ ābād karte jā.eñge

shāyad ki shahr meñ koī insān aa gayā
dekho hujūm sā hai sar-e-rahguzār kyā

be tere kyā vahshat ham ko tujh bin kaisā sabr o sukūñ
tū hī apnā shahr hai jaanī tū hī apnā sahrā hai

apnī sūrat se hirāsāñ hai har ik shaḳhs yahāñ
kaun is shahr meñ ab ā.ina-bardār rahe

chamakte ḳhvāb milte haiñ mahakte pyaar milte haiñ
tumhāre shahr meñ kitne hasīñ āzār milte haiñ

in galī-kūchoñ pe ye vaqt bhī aayā 'manzar'
shahar vāloñ ke badan ḳhuun meñ tar dekhe haiñ

sar par hamāre dhuup kī chādar sī tan ga.ī
ghar se chale to shahr ke manzar badal ga.e

ḳhatīb-e-shahr ne kī baat dostī kī magar
diloñ meñ tuḳhm adāvat ke bo ga.e alfāz

yahāñ jo aa gayā ik baar phir jaatā nahīñ hai
kashish aisī kuchh is shahr-e-sitam-ījād meñ hai

yaas ke shahr meñ ummīd-e-sahar kaun kare
jab añdheroñ ne banā rakkhī hoñ rāteñ qaidī

kahīñ surāġh nahīñ hai kisī bhī qātil kā
lahūluhān magar shahr kā nazāra hai

luuT le jaatā hai bas chaltā hai jis kā jitnā
raushnī shahr meñ taqsīm kahāñ hotī hai

log phirte haiñ bhare shahr kī tanhā.ī meñ
sard jismoñ kī salīboñ pe uThā kar chehre

be-rāz rāste haiñ manāzir udaas haiñ
qistoñ meñ mere shahr kā nīlām kyuuñ huā

vahī mohtaram rahe shahr meñ jo tafāvutoñ meñ lage rahe
jinheñ pās-e-izzat-e-harf thā vo riyāzatoñ meñ lage rahe

vo jo phuul the tirī yaad ke tah-e-dast-e-ḳhār chale ga.e
tire shahr meñ bhī sukūn hai tire be-qarār chale ga.e

nazar uThāo safīr-e-lailā bure tamāshoñ kā shahr dekho
ye merā qarya ye vahshatoñ kā amiin qarya

raunaq-e-dāman-e-sad-chāk kahāñ se laa.eñ
shahr meñ dasht kī poshāk kahāñ se laa.eñ

vo kaisā shahr thā mānūs bhī thā ajnabī bhī thā
ki jis kī ik galī meñ kho gayā mujh se patā merā