Tags-Shahr

ye terā shahr mirī saañs chhīn letā hai
maiñ apne gaañv meñ siina phulā ke chaltā huuñ

ham rahravān-e-shahr-e-tamannā ko kyā pata
manzil rah-e-talab se kahāñ tak judā bhī hai

duur āfāq pe lahrā.ī koī nuur kī lahr
ḳhvāb hī ḳhvāb meñ bedār huā dard kā shahr

chāñd un āñkhoñ ne dekhā aur hai
shahr-e-dil pe jagmagātā aur hai

raat abhī aadhī guzrī hai
shahr kī raunaq bujhī nahīñ hai

bhaḌaktī hai junūñ kī aag agar koh-o-bayābāñ meñ
koī tohmat havā-e-shahr pe dharne nahīñ detī

un ke har ik lams kā aisā asar mujh par huā
dil kī dīvāreñ sabhī shahr-e-nigārāñ ho ga.iiñ

dekho to har ik shaḳhs ke hāthoñ meñ haiñ patthar
pūchho to kahīñ shahr banāne ke liye hai

us shahr kī tauqīr haiñ 'jāzib' hī se āshiq
ushshāq ko nazroñ se girāyā nahīñ jaatā

qadam qadam pe huā jab munāfiqat kā shikār
to apne shahr kī vo būd-o-bāsh chhoḌ gayā

pūchhā subuk saroñ kā numā.inda kaun hai
sun kar faqīh-e-shahr kī dastār bol uThī

qabīla-vār adāvat kā silsila 'tāriq'
fasād-e-shahr kī sūrat meñ ab bhī chaltā hai

ab to ham shahr-e-nigārāñ se chale aa.e haiñ
bā.is-e-vahshat-e-dil husn-e-butāñ kyā hogā

vo aur hoñge jo sahrā meñ pā-ba-jaulāñ haiñ
mujhe to shahr ne ahkām par lagāyā huā hai

na.e kapḌe badal kar jā.ūñ kahāñ aur baal banā.ūñ kis ke liye
vo shaḳhs to shahr hī chhoḌ gayā maiñ bāhar jā.ūñ kis ke liye

chāroñ jānib raushnī phailī sūraj jab bhī niklā
mere shahr meñ jab vo aayā bahut dinoñ ke ba.ad

ik riyāsat thī mire paas navāboñ jaisī
ab tire shahr meñ phirtā huuñ gadāoñ jaisā

shahr ko tahzīb ke jhoñkoñ ne nañgā kar diyā
gaañv ke sar kā dupaTTa bhī uḌā le jā.eñge

ek qaidī kī tamannā hai nayā shahr mile
shahr aisā ki jahāñ par koī zindān na ho

bhiiḌ ke ḳhauf se phir ghar kī taraf lauT aayā
ghar se jab shahr meñ tanhā.ī ke Dar se niklā