Tags-Shahr

ḳhuun ke chhīñTe paḌe haiñ shaiḳh kī dastār par
shahr kī galiyoñ se aa.ī hai sadā takbīr kī

reshmī log DhūñDte haiñ ham
shahr ke āhanī makānoñ meñ

ajnabī shahroñ meñ tujh ko DhūñDhtā huuñ jis tarah
ik galī har shahr meñ terī galī jaisī bhī hai

koī miltā hī nahīñ aañkh milāne vaalā
maiñ tire shahr meñ sūraj kī tarah tanhā huuñ

ye dasht se umaD aayā hai kis kā sail-e-junūñ
ki husn-e-shahr khaḌā hai naqāb uThā.e hue

lo saare shahr ke patthar sameT laa.e haiñ ham
kahāñ hai ham ko shab o roz taulne vaalā

baat bas zarā sī thī baat hī to kī tum se
shahr bhar ke āvāze sun rahe ho ab bolo

ye ḳhvāhish to
hamāre shahr ke chiḌiyā-gharoñ ke sher bhī shāyad nahīñ karte

tamām shahr to be-mehr niiñd so rahā thā
magar maiñ āñkhoñ meñ nok-e-qalam chubho rahā thā

shahr ke ḳhālī station par
koī musāfir utrā hogā

saada fasīl-e-shahr mujhe dekhtī rahī
lekin maiñ terā naam bhī likh kar nahīñ gayā

tire shahr meñ hamesha yahī qillateñ sahī haiñ
kabhī us se tauq māñgeñ kabhī us se daad māñgeñ

ġharq hote shahr kī jaañ se alag
pāniyoñ par rāhateñ haiñ duur tak

shahr-e-tanhā.ī meñ mausam nahīñ badlā karte
din bahut chhoTā yahāñ raat baḌī hai ab bhī

bahut udaas haiñ hākim agar to shahr mirā
kisī fasād ke sāñche meñ Dhal rahā hogā

maiñ ne ik shahr hamesha ke liye chhoḌ diyā
lekin us shahr ko ā.ankhoñ meñ basā laayā huuñ

tamām shahr to āshob-e-chashm kā hai shikār
na jaane kis ke liye ham sañvarte jaate haiñ

ye qadam qadam pe bashārateñ ye nazar nazar meñ ziyārateñ
ye basārteñ ye bujhārteñ mire shahr-e-dil ko dikhā piyā

sar-bulandī ne mirī shahr-e-shikasta meñ kabhī
kisī dīvār ko sar par mire Dahne na diyā

'rāsiḳh' tamām gaañv ke sūkhe paḌe the khet
bārish kā zor shahr kī añgnā.iyoñ meñ thā