Tags-Shahr

hai ye shahr-e-ishq yaañ āb-o-havā kuchh aur hai
surḳh rañgat hai zamīñ kī aur fazā kuchh aur hai

hai judā is shahr-e-dil meñ lazzat-e-ranj-o-alam
is jagah ḳhūn-e-jigar kā zā.iqa kuchh aur hai

rāstoñ kā ilm thā ham ko na samtoñ kī ḳhabar
shahr-e-nā-mālūm kī chāhat magar karte rahe

ham ne ḳhud se bhī chhupāyā aur saare shahr ko
tere jaane kī ḳhabar dīvār-o-dar karte rahe

tū nahīñ hai to phir ai husn-e-suḳhan-sāz batā
is bhare shahr meñ ham jaise milā kis se kareñ

mujhī se pūchh rahā thā mirā patā koī
butoñ ke shahr meñ maujūd thā ḳhudā koī

har jagah qabr-e-gadā takiye meñ har jā gor-e-shāh
ek ghar is shahr meñ hai dūsre ghar kā javāb

hameñ hī show-case meñ sajā kar rakhā gayā thā
baḌe hamīñ shahr kī dukānoñ meñ rah ga.e haiñ

kareñ e'tibār kisī pe kyā ki ye shahr shahr-e-nifāq hai
jahāñ muskurāte haiñ lab kahīñ vahīñ tanz hai kisī baat meñ

in meñ to mujh se ziyāda hai pareshāñ-nazarī
ā.īne shahr-e-kamālāt meñ uljhe hue haiñ

ab ke hisār-e-zāt se bāhar nikal ke dekh
shahr-e-gulāb meñ kabhī kāñToñ pe chal ke dekh

maiñ junūn-e-ishq meñ jaane kahāñ tak aa gayā
shahr ke har moḌ se patthar judāgāna chalā

ḳhirāj maañg rahī hai vo shāh-bānu-e-shahr
so ham bhī hadiya-e-dast-e-talab guzārte haiñ

is shahr ke yahīñ kahīñ hone kā rañg hai
is ḳhaak meñ kahīñ kahīñ sone kā rañg hai

kyuuñ hameñ log samajhte haiñ yahāñ pardesī
ek muddat se isī shahr meñ ābād haiñ ham

is bhare shahr meñ koī aisā nahīñ
jo mujhe raah chalte ko pahchān le

vahshat ko apnī shahr o bayābāñ meñ jā nahīñ
aaqil ko ab duā o divāne ko ishq hai

yahāñ hai bhiiḌ meñ bhī kis qadar har shaḳhs tanhā
tumhāre shahr kā har ek manzar jāntā hai

na jaane kyā ho tere shahr meñ ab jā ke dekhūñgā
yahāñ to apnī qismat kā sitāra Duub jaatā hai

maiñ sar chhupā.ūñ kahāñ sāya-e-nazar ke baġhair
ki tere shahr meñ rahtā huuñ aur ghar ke baġhair