Tags-Shahr

ye shahr zehn se ḳhālī numū se aarī hai
balā.eñ phirtī haiñ yaañ dast o pā o sar ke baġhair

nikal ga.e haiñ jo bādal barasne vaale the
ye shahr aab ko tarsegā chashm-e-tar ke baġhair

koī nahīñ jo patā de diloñ kī hālat kā
ki saare shahr ke aḳhbār haiñ ḳhabar ke baġhair

kab talak shahr kī galiyoñ meñ phiroge yaaro
āsmānoñ pe uḌo taḳht-e-sulaimāñ kī tarah

maiñ shahr shahr bhaTaktā huuñ aur rozāna
ḳhud apnī zaat kī tāmīr kartā rahtā huuñ

ham ko ḳhabar hai shahr meñ us ke sañg-e-malāmat milte haiñ
phir bhī us ke shahr meñ jaanā kitnā achchhā lagtā hai

ḳhilqat-e-shahr to kahne ko fasāne māñge
merī rusvā.ī ke kyā kyā na bahāne māñge

ek āvāra-e-manzil se mohabbat kar ke
tū baḌe shahr meñ rahne ko Thikāne māñge

jitnī taz.hīk tire shahar meñ apnoñ kī huī
utnī tauhīn na hogī kahīñ begānoñ kī

log kyuuñ shahr-e-ḳhamoshāñ ko khiñche jaate haiñ
jaane kyā jaan hai is bastī meñ be-jānoñ kī

be-mahābā jam hī jaa.eñ dard kī jab mahfileñ
apne ġham ko shahr-e-baḳht-e-nā-rasā samjhā karo

be-rañg baḌe shahr kī hastī bhī vahīñ thī
ik rañg uḌātī huī titlī bhī vahīñ thī

is qadar ho ga.ī kasrat tire dīvānoñ kī
qais ghabrā ke chalā shahr ko vīrāne se

ik shahr jis ne kal mirī āvāz chhīn lī
vo shahr-e-be-navā thā mujhe itnā yaad hai

do jagah rahte haiñ ham ek to ye shahr-e-malāl
ek vo shahr jo ḳhvāboñ meñ basāyā huā hai

bānu-e-shahr hameñ tujh se nadāmat hai bahut
ek dil hai jo kisī aur pe aayā huā hai

har na.e shahr meñ kuchh rāteñ kaḌī hotī haiñ
chhat se dīvāreñ judā hoñgī to Dar jāoge

ab us kī yaad satāne ko baar baar aa.e
vo zindagī jo tire shahr meñ guzār aa.e

ik shaffāf tabī.at vaalā sahrā.ī
shahr meñ rah kar kis darja chālāk huā

ye kis ke zulm se har shai hai misl-e-sañg ḳhamosh
ai naqsh-gar dar-e-shahr-e-ḳharāb khol ke dekh