Tags-Shahr

ġhilāf-e-sañg meñ lipTā huā hai shahr kā shahr
chalī havā to zamīñ se ġhubār tak na uThā

shigāf-e-sar ko vajūd-e-havā-e-shor bahut
ye shahr-e-sañg hai yaañ tohmat-e-namak na uThā

dīvār kī har ḳhisht pe likkhe haiñ matālib
yuuñ shahr ko ā.īna-e-iz.hār kiyā hai

bīnā.ī mire shahr meñ ik jurm hai lekin
har aañkh ko rañgoñ ne giraftār kiyā hai

kaifiyat kaisī ajab is shahr kī yādoñ kī hai
garm hai ātish nahīñ aur sard hai shabnam nahīñ

ik alag tahzīb hai tanhā.iyoñ ke shahr kī
ek hī aalam hamesha aur koī mausam nahīñ

ik rasta us ke shahroñ kā ham us kī dhuul meñ dhuul hue
ik shahr us kī ummīdoñ kā aur ham sab us meñ rahte haiñ

arz-e-dakan meñ jaan to dillī meñ dil banī
aur shahr-e-lucknow meñ hinā ban ga.ī ġhazal

qātil-e-shahr se bach kar maiñ abhī aayā huuñ
maiñ akelā huuñ chale aao ki kuchh raat kaTe

shahr kī ik ik saḌak
phāñktī aa.ī hai lākhoñ hādsoñ kī sard dhuul

har nafas merā sulagte hue ḳhvāboñ kā dhuāñ
ārzūoñ kā koī shahr jalā hai mujh meñ

ye zindagī bhī kahīñ ho na shahar-zād kā ruup
shabāna roz kahānī na.ī sunātī hai

shahar meñ rañg hai na ḳhushbū hai
phir bhī charchā usī kā har-sū hai

shahr-zād shabnam se ye pūchhtā hai
ki sūraj ke siine meñ kyā kyā chhapā hai

shahr ke qānūn din meñ toḌnā āsāñ na thā
raat meñ niklī hai duniyā ilm kī tahsīl ko

ujaḌ gayā thā kisī zalzale meñ shahr-e-vafā
na jaane phir use ham ne bhī kyuuñ basāyā nahīñ

us shahr kī hifāzat karnī thī ham ko jis meñ
āñdhī kī thiiñ fasīleñ aur gard kā makāñ thā

dekhne niklā huuñ apnā shahr jañgal kī tarah
duur tak phailā huā hai aadmī chāroñ taraf

mulk-e-suḳhan meñ dard kī daulat ko kyā huā
ai shahr-e-'mīr' terī rivāyat ko kyā huā

shahr-panāh TuuT ke lo ho gayā khañDar
adh-kachchī ārzūoñ se ham shaad ho ga.e