Tags-Shahr

jahāñ pe sikka-e-zar kī khanak sunā.ī na de
faqīh-e-shahr ghaḌī bhar vahāñ Thahartā nahīñ

kahāñ kahāñ se uThā.e saroñ kī fasl koī
tamām shahr hī jab dasht-e-karbalā ho jaa.e

dekhiye jis ko use dhun hai masīhā.ī kī
aaj kal shahr ke bīmār matab karte haiñ

ye shahr-e-ajnabī meñ ab kise jā kar batā.eñ ham
kahāñ ke rahne vaale haiñ kahāñ kī yaad aatī hai

kabhī tā-der shabnam taḳht-e-gul par bhī nahīñ rahtī
amīr-e-shahr ko itnā ishāra kar ke dekhā jaa.e

terī auqāt hī kyā 'mid.hat-ul-aḳhtar' sun le
shahr ke shahr zamīnoñ ke tale dab ga.e haiñ

apne saa.e se gurezāñ nahīñ ik tū hī 'rabāb'
shahr bhar ko ye vabā saath liye phirtī hai

aa rahī hai phir chunāv kī ḳhabar
shahr bhar meñ ḳhāmushī hai āj-kal

huā hai hukm ye min-jānib-e-shah-e-zulmāt
hudūd-e-shahr-e-siyah chhoḌ de dīvān-e-shab

faqīr-e-shahr bhī rahā huuñ 'shahryār' bhī magar
jo itminān faqr meñ hai tāj-o-taḳht meñ nahīñ

har ek shahr kā me.aar muḳhtalif dekhā
kahīñ pe sar kahīñ pagḌī kā ehtirām huā

aaj mujhe kuchh log mile haiñ pāgal se
shahr meñ vahshī dar aa.e kyā jañgal se

ye jo chaar din kī thī zindagī ise tere naam na kar sakā
mujhe rañj hai tire shahar meñ ye safar tamām na kar sakā

har gaañv suhānā ho har shahr chamak uTThe
dil kī ye tamannā hai puurī ho magar kaise

tūfān aa.e shahr meñ yā koī zalzala
mujh ko kisī bhī baat kā ab Dar nahīñ rahā

hamāre shahr kā ahvāl mat pūchh
hamārā shahr kuufa ban rahā hai

shahr apnā harā-bharā ik baaġh
chalte phirte hue gulāboñ kā

ain mumkin hai ki ho us se ilāj-e-vahshat
shahr meñ zor se ik naam pukārā jaa.e

bevafā aise to hargiz na the pahle ham log
ek hī shahr meñ rah kar nahīñ milte ham log

nikālā kisī ne na patthar se bāhar
mire shahr meñ roz but-sāz aa.e