Tags-Shahr

kahīñ sānehe mileñge kahīñ hādisa milegā
tire shahr kī fazā se mujhe aur kyā milegā

merā jī jaane hai yā merā ḳhudā jaane hai
kyā sunā hai tire is shahr meñ kyā dekhā hai

shahar parbat bahr-o-bar ko chhoḌtā jaatā huuñ maiñ
ik tamāshā ho rahā hai dekhtā jaatā huuñ maiñ

aane lagī hai ye sadā duur nahīñ hai shahr-e-gul
duniyā hamārī raah meñ kāñTe bichhā chukī bahut

milā ye hukm ki sab log yaañ se Tal jaa.eñ
isī meñ ḳhair hai jo shahr se nikal jaa.eñ

shā.er aur takabbur meñ kyā rishta in meñ nisbat kyā
shahr-e-suḳhan meñ rakhiye apne sar ko ḳham me.aar buland

savād-e-shahr-e-ḳhamoshāñ kā dekhiye manzar!
sunā na ho jo ḳhamoshī ko guftugū karte

jab hijr ke shahr meñ dhuup utrī maiñ jaag paḌā to ḳhvāb huā
mirī soch ḳhizāñ kī shāḳh banī tirā chehra aur gulāb huā

bhare shahr meñ ek hī chehra thā jise aaj bhī galiyāñ DhūñDtī haiñ
kisī sub.h usī kī dhuup khilī kisī raat vahī mahtāb huā

bikhar gayā thā sar-e-shahr-e-āshiyāna maiñ
kisī ke rabt ne ta.amīr kar liyā hai mujhe

shahr-e-tamannā ke markaz meñ lagā huā hai melā sā
khel-khilaunoñ kā har-sū hai ik rañgīñ gulzār khilā

ham jo luTe us shahr meñ jā kar dukh logoñ ko kyuuñ pahuñchā
apnī nazar thī apnā dil thā koī parāyā maal na thā

chaman-e-shahr to vīrāñ thā magar is ghar meñ
itnī nik.hat hai ki tum ek gulistāñ ho zarūr

jab se us ne shahr ko chhoḌā har rasta sunsān huā
apnā kyā hai saare shahr kā ik jaisā nuqsān huā

yuuñ bhī kam-āmez thā 'mohsin' vo is shahr ke logoñ meñ
lekin mere sāmne aa kar aur bhī kuchh anjān huā

maiñ tirī yaad ko siine se lagā.e guzrā
ajnabī shahr kī mashġhūl guzar gāhoñ se

miTTī se jab phuul khilā.e kār-e-junūñ kī mehnat ne
shahr kuchh is andāz se phaile jā pahuñche vīrāne tak

har shaam yahāñ shām-e-vīrāñ āseb-zada raste galiyāñ
jis shahr kī dhun meñ nikle the vo shahr dil-e-barbād kahāñ

ab dhanak ke rañg bhī un ko bhale lagte nahīñ
mast saare shahr vaale ḳhuun kī holī meñ the

ḳhuub gaav bajāo aur piyo
in dinoñ shahr meñ janāb nahīñ