Tags-Shahr

ḳhyāl-e-bad se hama-vaqt ijtināb karo
fazā-e-shahr ko dānista mat ḳharāb karo

tamām shahr hai Duubā huā añdhere meñ
tum apne chāñd se chehre ko be-naqāb karo

koī batā.e kahāñ shahr-e-ārzū hogā
ki jis maqām pe dāman ke chaak silte haiñ

diye hoñ itne ki ḳhvāboñ ko rāsta na mile
to shahr apnī rivāyāt chhoḌ dete haiñ

dar-ba-dar bhaTaktī hai dasht o shahr o sahrā meñ apnā sar paTaktī hai
ai havā-e-avāra terī hī tarah be-ghar be-amāñ to maiñ bhī huuñ

ye inqilāb-e-zamāna nahīñ to phir kyā hai
amīr-e-shahr jo kal thā vo hai faqīroñ meñ

chalo dushman ko siine se lagā leñ
kahāñ is shahr meñ apnā milegā

dukh-bharā shahr kā manzar kabhī tabdīl bhī ho
dard ko had se guzarte koī kab tak dekhe

har ek shai mirī jānib hī multafit hogī
maiñ tere saath agar shahr-e-jāñ se guzrūñgā

jeb meñ dil thaile meñ patthar le kar 'arsh'
shahr koī dīvāna DhūñDhtā rahtā hai

tum amīr-e-shahr ke ghar ko jalā kar dekhnā
ghar meñ ho jā.egā muflis ke ujālā umr bhar

shahr-e-dillī se hameñ aur to kyā lenā thā
apnī sāñsoñ ke liye taaza havā māñgī thī

shahr-āshob meñ chīzoñ kā koī qaht nahīñ
zaḳhm milte haiñ dukānoñ meñ gul-e-tar kī tarah

ġham kī tahzīb aziyyat kā qarīna sīkheñ
aao is shahr meñ jiinā hai to jiinā sīkheñ

shahr-e-kotāh meñ sab past-nashīñ past-nishāñ
kis ko hamrāz kareñ kis kā qarīna sīkheñ

dil-o-dimāġh-o-nafas tishnagī se haiñ raushan
isī kī aag meñ jalte haiñ shahar-o-sahrā bhī

khaḌī hai taaj pahne shahr meñ ḳhār-e-muġhīlāñ kā
javāb-e-tāza dene zindagī kohna savāloñ ko

ek ujḌī huī hasrat hai ki pāgal ho kar
bain har shahr meñ kartī huī dekhī ga.ī hai

maiñ saare shahr meñ badnām huuñ ḳhabar hai mujhe
vo mere naam se kyā fā.eda uThā.egā

ufuq se aag utar aa.ī hai mire ghar bhī
shikast hote haiñ kyā shahar apne andar bhī