Tags-Shahr

vo shahr meñ thā to us ke liye auroñ se bhī milnā paḌtā thā
ab aise-vaise logoñ ke maiñ naaz uThā.ūñ kis ke liye

laboñ pe jam ga.ī dīvār-o-dar kī ḳhāmoshī
tamām shahr thā vīrāñ sadā lagāte kyā

har nākāmī ne aise bhī kuchh dīvāreñ khīñchī haiñ
ik be-naqsha shahr banā hai lā-hāsil tadbīroñ kā

kyā musībat hai shahr vāloñ par
rakh ke sāmān sar pe nikle haiñ

vo shahr basā bhī thā hamārī hī badaulat
is shahr-e-tamannā kī tabāhī bhī hamīñ the

sar par thī kaḌī dhuup bas itnā hī nahīñ thā
us shahr ke peḌoñ meñ to saayā hī nahīñ thā

apne gharoñ ke kar diye āñgan lahū lahū
har shaḳhs mere shahr kā qābīl ho gayā

ai asīr-e-qafas sahr-e-anā dekh aa kar
kitnā mushkil hai tire shahr se hijrat karnā

jal gayā hotā shuā-e-mehr se ye shahr bhī
ḳhairiyat guzrī ki ḳhvāboñ kā nagar paanī meñ hai

āgara shahr meñ mohabbat kā
ek mīnār jagmagātā hai

havā ke shahr meñ bas saañs lene aate haiñ
vagarna ahl-e-zamīñ haiñ ḳhalā se lipTe hue

maiñ to is shahr se nā-vāqif huuñ
is meñ sach baat ravā to hogī

dil kā chhūnā thā ki jazbāt hue patthar ke
aisā lagtā hai ki ham shahr-e-tilismāt meñ haiñ

aap ke shahar meñ peḌoñ kā nahīñ koī shumār
do ghaḌī rukne ko lekin kahīñ saaya na milā

kahīñ intihā kī malāmateñ kahīñ pattharoñ se aTī chhateñ
tire shahr meñ mire ba.ad ab koī sar-phirā nahīñ aa.egā

raat ik shahr ne taaza kiye manzar apne
niiñd ā.ankhoñ se uḌī khol ke shahpar apne

shahr sotā hai raat jaatī hai
koī tūfāñ hai parda-dar ḳhāmosh

mere riste hue zaḳhmoñ kā mudāvā na huā
ye shikāyat hai tire shahr ke ādāb se bhī

shahr-e-korāñ meñ bhī ā.īna farosh aate haiñ
be-tajallī koī qarya nahīñ rahne dete

lāzim hai ehtiyāt faqīhān-e-sheher ko
har ik nazar hai ab sar-e-mimbar lagī huī