Tags-Shahr

aaj phir shahr meñ uTThegā koī hañgāma
aaj sach kahne kī ik shaḳhs ne jur.at kī hai

aziyyatoñ kī bhī apnī hī ek lazzat hai
maiñ shahr shahr phirūñ nekiyāñ talāsh karūñ

is shahr meñ hai kaun hamārā tire sivā
ye kyā ki tū bhī apnā kabhī ham-navā na ho

mauj-e-havā-e-shahr-e-muqaddar javāb de
dariyā mire na the ki samundar mirā na thā

shahr-e-butāñ hai 'ātish' allāh ko karo yaad
kis ko pukārte ho hazrat nahīñ hai koī

shahr bhī likkhā makāñ likkhā mohalla likhā
ham kahāñ ke the magar us ne kahāñ kā likhkhā

tirī āvāz ko is shahr kī lahreñ tarastī haiñ
ġhalat number milātā huuñ to pahroñ baat hotī hai

jā ke ham dekh chuke band hai darvāza-e-shahr
ek raat aur ye rukne kā bahāna achchhā

miT gayā par tirī bāñhoñ ne sameTā na mujhe
shahr dar shahr maiñ galiyoñ meñ bikhartā hī rahā

sar-e-shām luT chukā huuñ sar-e-ām luT chukā huuñ
ki Dakait ban chuke haiñ ka.ī shahr ke sipāhī

'sarvat' hadaf bahut haiñ javānān-e-shahr meñ
rakkho abhī na tiir o kamāñ apne haath se

is jagah shahr honā chāhiye thā
sāmne dekhiye to jañgal hai

nazar aatā nahīñ insān koī
hamārā shahr sahrā ho gayā hai

vo to hashr thā magar us kī ab vo shabāhateñ bhī chalī ga.iiñ
jo raheñ to shahar meñ kyā raheñ ki qayāmateñ bhī chalī ga.iiñ

ye puḳhta-kār taġhazzul ḳhayāl ke bal par
ġhazal ke shar-e-qafas meñ guzār aa.egā

tujh jaisā ḳhush-jamāl mire shahr meñ nahīñ
dil chāhtā hai aaj tujhe saath le chalūñ

muntazir kab se hai tāroñ kā samundar terā
shaam se shahr-e-nigārāñ kī tarah vāpas aa

kaun suntā hai vahāñ terī sadā.eñ 'mīnā'
apne ghar shahr-e-ḳhamoshāñ kī tarah vāpas aa

yārān-e-shahr ishq meñ be-ābrū hue
ham par to mehrbāñ vo kabhī the kabhī na the

ham jin kī nazr karte javāhar kalām ke
'tāhir' hamāre shahar meñ vo jauharī na the