Tags-Shahr

qabā.il aaj bhī shīr-o-shakar nazar aate
ḳhatīb-e-shahr magar vo zabān bhuul gayā

apnī gumnāmī ke sahrāoñ meñ ḳhush rahtī huuñ
ab mujhe shahr tumhāre nahīñ achchhe lagte

jis roz se ham shahr-e-tamannā meñ luTe haiñ
afsurdagī ham-shakl-e-munājāt huī hai

har sar se āsmān kī chhat uTh nahīñ ga.ī
kab tajarbe meñ shahr ye sahrā nahīñ hue

aanā bhī terā ġhazab huā is shahr kā manzar badal gayā
bhauñchāl sā aayā galī galī har chiiz idhar se udhar huī

bīmār ho gayā huuñ shifā-ḳhāna chāhiye
ye saarā shahr mujh ko bayābāna chāhiye

ūdham machā rahe haiñ bahut log shahr ke
'ehsās-jī' ko dasht se bulvānā chāhiye

dil kuchh aur bhī sard huā hai shām-e-shahr kī raunaq se
kitnī ziyā be-sūd ga.ī shīshe ke lafz jalāne meñ

hidāyatoñ kā hai mohtāj nāma-bar kī tarah
faqīh-e-shahr tilism-e-bayāñ ke hote hue

zindagānī ke hasīñ shahr meñ aa kar 'jāmī'
zindagānī se kahīñ haath milā.e bhī nahīñ

Duub jaatā huuñ maiñ har sub.h ufuq meñ dil ke
shahr-e-jānāñ se pare shahr-e-ḳhamoshāñ ke qarīb

ajnabī huuñ maiñ tire shahr-e-karam meñ ai dost
kyā hai is shahr kā dastūr mujhe kyā ma.alūm

band kar le khiḌkiyāñ yuuñ raat ko bāhar na dekh
Dūbtī āñkhoñ se apne shahr kā manzar na dekh

ye shahr hai vo shahr ki jis meñ haiñ be-vaj.h kāmyāb chehre
yahāñ siyāsat kī āñdhiyoñ ne miTā diye māhtāb chehre

badal ke rakh diyā jañgal ko shahr meñ us ne
tamām dasht pareshāñ hai ek aahū se

mire hī dam se to raunaqeñ tere shahr meñ thiiñ
mire hī qadmoñ ne dasht ko rah-guzar kiyā hai

ḳhvāhisheñ rasta dikhā detī haiñ varna yaaro
dil vo zarra hai jise shahr-e-talab yaad nahīñ

gard sī baaqī hai ab zehn ke ā.īne par
kaise ujḌā hai mirā shahr-e-tarab yaad nahīñ

dhuup meñ kaun kise yaad kiyā kartā hai
par tire shahr meñ barsāt to hotī hogī

niist be-yār mujh ko hastī hai
shahr-e-vīrāñ ujaaḌ bastī hai