Tags-Shajar

sunā rahe haiñ shajar ruḳhsat-e-bahār kā sog
samar to kyā koī patta nahīñ qubūl kiyā

jabr mausam ke haiñ jitne bhī shajar ke liye haiñ
un ko kyā is se jo betāb samar ke liye haiñ

tumhārā shahr mire gaañv se hai kitnā alag
yahāñ guloñ kī jagah khilte haiñ shajar meñ charāġh

kaheñge ham bhī kabhī intizār ke qisse
tumhārā pyaar shajar aur pyaar ke qisse

sañg aatā hai koī jab mire sar kī jānib
dekh letā huuñ samar-bār shajar kī jānib

vo ghaḌī-do-ghaḌī jahāñ baiThe
vo zamīñ mahke vo shajar mahke

maiñ ne jaḌ se ukhāḌnā chāhā
us shajar ko jise mohabbat se

jo sin-rasīda shajar the saare jaḌoñ se apnī ukhaḌ rahe haiñ
zamīñ ke rishtoñ kī chhāñv yaaro saroñ se apne bhī chhaT rahī hai

Kaif-e-sehba-e-Tarab meñ ġharq-e-maiḳhāna hai aaj
har shajar sāqī-e-mai har phuul paimāna hai aaj

rut na badle to bhī afsurda shajar lagtā hai
aur mausam ke taġhayyur se bhī Dar lagtā hai

maazī ke be-barg shajar par baiThā huuñ
mustaqbil ke giit sunāne vaalā maiñ

bichhaḌ ke tujh se na dekhā gayā kisī kā milāp
uḌā diye haiñ parinde shajar pe baiThe hue

dekhā na ham ne yaañ bhī shajar koī sāya-dār
ya.anī dayār-e-ishq bayābāñ se kam na thā

shajar samajh ke mirā ehtirām karte haiñ
parinde raat ko mujh meñ qayām karte haiñ

be-makānī kī bhī tahzīb huā kartī hai
un parindoñ ne bhī ek ek shajar bāñdh liyā

shajar-e-ishq to māñge hai lahū ke aañsū
tab kahīñ jā ke koī shāḳh harī aave hai

havā ke rahm-o-karam par huuñ be-Thikāna huuñ
shajar se TuuTā huā ek zard pattā huuñ

zindagī kis shajar kā saaya hai
maut kis dasht kī masāfat hai

pesh-ḳhema hai 'shanāvar' ye kisī tūfān kā
sab parinde uḌ ga.e haiñ aur shajar ḳhāmosh haiñ

dil pe aatā hī nahīñ fasl-e-tarab meñ koī phuul
jaan, is shāḳh-e-shajar par to na vāreñge tumheñ