Tags-Shajar

palaTnā paḌtā hai har shaam un parindoñ ko
na jaane kaun sī shai ko shajar meñ rakhte haiñ

tulā hai dhuup barsāne pe sūraj
shajar bhī chhatriyāñ le kar khaḌe haiñ

hayāt-e-jabr kā sahrā-e-be-karāñ jis meñ
mohabbatoñ ke shajar kā kahīñ bhī saayā nahīñ

apne saa.e se jo na ho mahrūm
aisā koī shajar nahīñ hotā

ye khet sabza shajar rahguzār sannāTā
ugā hai duur talak be-shumār sannāTā

ek aaseb kā saaya thā jo sar se utrā
jaise ik tā.ir-e-manhūs shajar se utrā

jo dhuup de gayā mujh ko vo merā sūraj thā
jo chhāñv de na sakā vo shajar na thā merā

haiñ darj aane vaalī rutoñ ke hisāb meñ
patte jhaḌe hue shajar-e-māh-o-māl se

maut hayāt ke shajar kā phal hai
use bhī chakh kar dekho

ab ke bahār dekhiye kyā naqsh chhoḌ jaa.e
āsār bādaloñ ke na patte shajar meñ haiñ

aañkh har shab ko añdheroñ kī qabā dhotī hai
ḳhvāb kī ret meñ sūraj kā shajar botī hai

vo harf hī to hamāre sar par
jo ek sāya-numā shajar thā

bahut zarūrī hai ye dhuup Tālne ke liye
shajar lagā ke tire falsafe ko aam kareñ

na kārvāñ na manāzil na rahguzar na safar
hayāt jaise khaḌā ho koī shajar tanhā

yak-shabī niiñd ke tasavvur meñ ūñghtā hai
ḳhizāñ-rasīda anaar kā ik shajar khaḌā hai

shajar pe zahr ne ab rañg dikhlāyā hai apnā
rutoñ ke saañp yuuñ to muddatoñ se Das rahe the

mere ghar se us kī yādoñ ke makīñ jaate nahīñ
chhoḌ kar jaise shajar apnī zamīñ jaate nahīñ

mujhe Darā nahīñ saktī ye mushkiloñ kī dhuup
abhī ummīd kā baaqī hai ik shajar mujh meñ

mire paañv meñ Daalī hai ye zanjīr-e-āsā.ish
jo saa.e bāñTtā hai us shajar se baat karnī hai

talab-e-mudda.ā havas-e-nāravā jo kabhī kuchh kahā vo hue be-maza
vo bajā-e-jazā suḳhan-e-nāstrā shajar-e-hirs kā samar-e-ḳhām thā