Tags-Shajar

bulandī par unheñ miTTī kī ḳhushbū tak nahīñ aatī
ye vo shāḳheñ haiñ jin ko ab shajar achchhā nahīñ lagtā

shahr ke dīvār-o-dar par rut kī zardī chhā.ī thī
har shajar har peḌ kī qismat meñ ab tanhā.ī thī

roz maiñ ik shajar se miltā huuñ
zindagī kyā bhañvar se miltā huuñ

shajar haiñ aur is miTTī se paivasta raheñge
jo ham meñ se nahīñ āsā.ishoñ se jā milegā

sahrā kā safar thā to shajar kyuuñ nahīñ aayā
māñgī thiiñ duā.eñ to asar kyuuñ nahīñ aayā

kal aañkh ke shajar se ka.ī phuul yaad ke
palkoñ se ho ke dil kī saḌak ḳhuub bhar ga.e

ye iftiḳhār-e-shajar shāḳh-e-nau-bahār se hai
jo pā.emāl-e-ḳhizāñ thā vo sar-buland huā

sun zarā ġhaur se sun ai shajar-e-sāya-fagan
jab tire saa.e meñ pahuñchūñ to samar bhī denā

har ek tuḳhm ko rizq-e-shikam-purī na samajh
hunar bhī siikh zamīñ se shajar banāne kā

aa gayā us kī buzurgī kā ḳhayāl āñdhī ko
ve jo ik raah meñ bosīda shajar aa gayā hai

maiñ dasht-e-hū kī taraf jab uḌaan bhartā huuñ
tirī sadā ke shajar phir bulāne lagte haiñ

abhī to kuchh log zindagī meñ hazār sāyoñ kā ik shajar haiñ
unhīñ ke sāyoñ meñ qāfile kuchh Thahar ga.e be-qayām kahnā

aur chalnā hai to be-ḳhauf-o-ḳhatar niklo bhī
na kisī abr kā saaya na shajar aa.egā

usī ne yaad dilā.ī hai aaj gautam kī
rishī lagā hai ye sūkhā huā shajar mujh ko

havā.eñ phuul shajar aur chhāñv us kī thī
isī liye to maiñ tāzīm kar chukī thī vahāñ

harā shajar na sahī ḳhushk ghaas rahne de
zamīñ ke jism pe koī libās rahne de

tā.ir-e-yād ko kam thā shajar-e-dil varna
be-sabab tark-e-sukūnat nahīñ kī jā saktī

maiñ ne saat parinde uḌte dekhe the
ek parinda aur shajar kī oT meñ thā

ek sūkhā huā shajar 'jīnā'
ġham ne tere harā-bharā rakkhā

jo kahīñ bhī Thahar jaa.e so aur hai
ai shajar hai musalsal safar zindagī