Tags-Shama

tārīk ho na jaa.e kahīñ mahfil-e-hayāt
ab āñdhiyoñ kā zor hai sham-e-hayāt par

raat bhar dard kī sham.a jaltī rahī
ġham kī lau thartharātī rahī raat bhar

ḳhvāb meñ bhī ab nahīñ 'shā.ir' vo garmi-e-kalām
sham.a sī ik rah ga.ī hai jhilmilāne ke liye

ek adnā se patiñge ne banā dī jaan par
sham.a ne koshish to kī thī dil jalāne ke liye

parvāne se āshiq ke ta.iiñ sham.a jalā kar
phir aap bhī rotī hai khaḌī baḳht-jalī chup

ab tak ik sham-e-siyah-posh huuñ sahrā sahrā
tujh se chhuT kar na milī rahguzar-e-ḳhvāb mujhe

saañs Thahre to dam zarā Thahre
tez āñdhī meñ sham.a kyā Thahre

bātāñ lagan kī mat pūchh ai sham-e-bazm-e-ḳhūbī
muddat se tujh jhalak kā parvāna ho rahā huuñ

jaate jaate bhī to ham ko ik ziist kā unvāñ de ke gayā
bujhtī huī sham-e-mahfil ko phir sho.ala-e-raqsāñ de ke gayā

rone vaale hue chup hijr kī duniyā badlī
sham.a be-nūr huī sub.h kā taarā niklā

māh-e-man sham.a tuman dil ke shabistān meñ aa
nūr-e-dīda ho merī chashm ke aivān meñ aa

jān-e-gulshan aur jānān-e-bahār
jāvedāñ sham-e-shabistān-e-bahār

jafā-o-zulm ke is tund tez tūfāñ meñ
vo mujh se kahte haiñ sham-e-vafā jalāne ko

maqtal meñ jis ko apne lahū se jalāyā thā
pur-nūr us ek sham-e-farozāñ se kaun hai

sham.a ik jalāne par kaisī kaisī pābandī
nuur par bhī pābandī tuur par bhī pābandī

yuuñ rāhī-e-adam huī bā-vasf-e-uzr-e-lañg
mahsūs aaj tak na hue naqsh-e-pā-e-sham.a

kah do ye sham.a se ki abas tū hai ashk-bār
paanī se dil kī aag bujhā.ī na jā.egī

sham.a bujhtī hai to us meñ se dhuāñ uThtā hai
sho.ala-e-ishq siyah-posh huā mere ba.ad

ham vafā-keshoñ kā īmāñ bhī hai parvāna-sifat
sham-e-mahfil jo vo kāfir na rahā aur sahī

is sham-e-farozāñ ko āñdhī se Darāte ho
is sham-e-farozāñ ke parvāne hazāroñ haiñ