Tags-Shama

nahīñ hai lutf ki ḳhalvat meñ ġhair shāmil ho
uThā do sham.a ko ye bhī hai jalne vāloñ meñ

nasīm-e-sham.a-e-lahad ko zarā bachā.e hue
yahī hai ek ġharīboñ ke rone vāloñ meñ

soḳhta parvāne kushta sham.a farsh-e-dāġhdār
de rahe haiñ raat kī garmi-e-mahfil kā patā

manziloñ us ko āvāz dete rahe manziloñ jis kī koī ḳhabar bhī na thī
dāman-e-shab meñ koī sitāra na thā sham.a koī sar-e-rahguzar bhī na thī

sahar hote bujhā.e kaun ai sham-e-lahad tujh ko
koī jhoñkā nasīm-e-sub.h kā ab tak nahīñ aayā

rāh-e-dard meñ koī ham-safar nahīñ hotā
apnī aag meñ ḳhud hī sham.a saañ pighalte haiñ

ik na aane vaale kā intizār karte haiñ
sham-e-rah-guzar haiñ ham roz bujhte-jalte haiñ

qatl-gāhoñ meñ lahū apnā nichhāvar kar ke
sham-e-insāf kī lau ham ne baḌhā rakkhī hai

ai sham.a bahā ashk chhupā rāz-e-mohabbat
ḳhākistar-e-parvāna hai betāb lagan meñ

aañkh vaale tirī sūrat pe miTe jaate haiñ
sham-e-mahfil kī taraf bhiiḌ hai parvānoñ kī

apnī qismat meñ kahāñ raqs-e-sharar kā manzar
sham-e-jāñ bujh ga.ī dāman kī havā se pahle

kahte haiñ dekh ke zulf us ke ruḳh-e-tābāñ par
kabhī hotā nahīñ us sham.a se gul-gīr judā

tujh bin ai sham.a-rū mujhe har shab
sho.ala sā iztirāb meñ rahnā

shab-e-ġham dāġh-e-dil kī sham.a jalā
chāñd-tāroñ kā intizār na kar

shāyad kahīñ sūraj kī kiran shaam ko phūTe
ham sham.a jalā.e hue baiThe haiñ sahar se

is qadar charb-zabānī nahīñ achchhī ai sham.a
bazm-e-jānāñ meñ zabāñ kaTtī hai guftār ke saath

garmī se maiñ to ātish-e-ġham kī pighal gayā
rātoñ ko rote rote hī joñ sham-e-gul gayā

barastā bhīgtā mausam dhuāñ dhuāñ hogā
pighaltī sham.a pe chehra koī gumāñ hogā

jagmagā uTThe haiñ atrāf-o-javānib meñ diye
sham-e-mahfil kī pazīrā.ī meñ parvāne lage

charāġh-e-ḳhāna se vo ban ga.e haiñ sham.a mahfil kī
agar aisā na hotā phir ye parvāne kidhar jaate