Tags-Shama

zindagī sham.a kī mānind jalātā huuñ 'nadīm'
bujh to jā.ūñgā magar subah to kar jā.ūñgā

guzrā rag-e-gardan se ki juuñ sham.a sar apnā
talvār hī khātā hai garebāñ se nikal kar

huī sham-e-husn raushan to maiñ ban gayā patañgā
tirī bandagī thī suunī mirī zindagī se pahle

sham.a-rū mom ke bane haiñ magar
garm Tak maliye to pighalte haiñ

juuñ sham.a mujhe sharm hai zunnār kī ai shaiḳh
maalā na japūñ raat ko be-ashk-fishānī

āñdhī aur tūfān bhī is ko rok sake na rāhoñ meñ
duur se aayā hai parvāna sham.a hī par miT jaane ko

mirā soz-e-hastī hai dūr-az nadāmat
maiñ parvāna huuñ sham-e-mahfil nahīñ huuñ

nisbat nahīñ mujh ko kuchh bekas ke bujhe dil se
bujhte hue tujh ko bhī aa.e sham-e-sahar dekhā

dāġh-e-dil apnā jab dikhātā huuñ
rashk se sham.a ko jalātā huuñ

haiñ ye sīmāb-o-barq-o-sho.ala-o-sham.a
is dil-e-be-qarār kī mānind

zulmateñ chhīn na leñ ham se muqaddas chehre
sham-e-maslūb tire shola-ba-sar aane tak

tum apne ghar ke añdhere meñ kyā dekhte ho dīvāroñ ko
ye sham.a kī sūrat jalnā kyā aa.egī havā bujh jāoge

vo aa.e bhī nahīñ aur zindagī kī raat jaatī hai
sahar hotī hai aur sham-e-tamannā jhilmilātī hai

umr bhar Doltī yādoñ kī ziyā se khele
sham-e-ummīd liye tez havā se khele

na us ke dāman se maiñ hī uljhā na mere dāman se ye hī aTkī
havā se merā bigāḌ kyā hai jo sham-e-turbat bujhā rahī hai

lagā huā hai ye dhaḌkā ki bujh na jaa.e kahīñ
havā meñ sham-e-mohabbat jalī hai mushkil se

jab bhī jalegī sham.a to parvāna aa.egā
dīvāna le ke jaan kā nazrāna aa.egā

yuuñ to reza hai juz hai sham.a hai
kul meñ lekin jasīm hai zarra

dil yuuñ bujhā bujhā sā hī kho kar tumhārī yaad
mahfil meñ jaise sham-e-farozāñ nahīñ rahī

yuuñ to ham har sham-e-ilm-o-fan ke parvāne rahe
ye haqīqat hai ki ham tere bhī dīvāne rahe