Tags-Shama

har taraf hai us se mere dil ke lag jaane meñ dhuum
bulbul-o-gul meñ hai chah-chah sham-o-parvāne meñ dhuum

'nātiq' diloñ meñ nuur hai is sham-e-husn kā
raushan hai sab ke ghar kā charāġh is charāġh se

kahāñ sar-e-sham.a par hai sho.ala nigāh Tuk kiije sham.a-dāñ par
ki ustuḳhāñ hai ġhizā hamārī humā ye baiThā hai ustuḳhāñ par

kisī ke uThne se suunī na hogī bazm koī
bahār-e-sham.a salāmat hazār parvāne

lagāo aas nā ummīd rakkho tum 'māham'
bujhāo sham.a vo qissa tamām kar baiThe

mahrūm thā soz-e-ulfat se jal jaane se begāna thā
fānūs ke andar sham.a rahī bāhar bāhar parvāna thā

yuuñ bhī tartīb de qissa kabhī fasl-e-gul kā
baaġh meñ sham.a jalā taaq meñ sabza likh de

ik sham.a rah-e-shauq meñ manzil kī nishānī
ik paikar-e-lafzī kī navā-ḳhez javānī

ai shola-rū zabānī hai terī garm-joshī
maiñ ḳhuub rabt-e-sham-o-parvana jāntā huuñ

tumhārā ġham ise āshob-e-sarasar bachā.e gā
havāoñ se bhaḌak uTThī hai sham-e-zindagī apnī

shab-e-furqat nazar aate nahīñ āsār-e-sahar
itnī zulmat hai ruḳh-e-sham.a pe bhī nuur nahīñ

ye raushnī tire kamre meñ ḳhud nahīñ aa.ī
sham.a kā jism pighalne ke baad aa.ī hai

hamesha sham.a bhaḌkegī sadā paimāna chhalkegā
tirī mahfil meñ ham chhoḌ aa.e haiñ josh-e-bayāñ apnā

jal-bujhne kī bhī taufīq kahāñ ushshāq kī qismat meñ
ik an-dekhī sham-e-bazm ke dil vaale parvāne haiñ

mūnis-e-ḳhalvat-e-vafā aaj bhī hai vo dil ki jo
sham.a kī lau meñ thartharā.e chāñd ke saath Duub jaa.e

afsos mū-e-sham-e-shab-e-vasl kī mānind
jo qahqaha shādī hai so shevan hai hamārā

bazm meñ jo tirā zuhūr nahīñ
sham-e-raushan ke muñh pe nuur nahīñ

na ghabrā chāhne vāloñ se ye to ain-e-fitrat hai
ki sham.a nūr-afshāñ ho to parvāne bhī aate haiñ

ai sham.a sub.h hotī hai rotī hai kis liye
thoḌī sī rah ga.ī hai ise bhī guzār de

ye zindagī kī raat hai tārīk kis qadar
donoñ siroñ pe sham.a jalāo nashe meñ aao