Tags-Shama

vo ek sham ki ḳhud jal uThe haiñ ghar ke charāġh
vo ek sub.h ki ḳhud jis pe ro paḌī shabnam

TuuT kar mai pe yuuñ girī tauba
jaise parvāna sham-e-mahfil par

juuñ sham.a agar na sar dhunūñ meñ
kyā kaam karūñ varā-e-afsos

is rāz-e-ishq ko kahīñ ro ro ke sham.a saañ
iz.hār kījiyo na 'jahāñdār' dekhnā

sham-e-jamāl apne pe chāhe jo imtihāñ
parvāna-vār mujh ko bhī yak-bār dekhnā

bujhtī sham.a kī sūrat kyuuñ afsurda khaḌe ho khiḌkī meñ
dekho shaam hai kis darja dilkash is dhuup kī vardī meñ

rusvā na kar is soz ko ai sham-e-lab-e-gor
jo vāqif-e-dil-sozi-e-hamdam na huā thā

be-soz hai bazm-e-ilm-o-dānish
sham-e-yaqīñ kā parvāna ban jā

us dasht meñ mirā hī hayūlā thā har taraf
maiñ ne hī sham-e-ishq jalā lī koī na thā

havā.eñ detī haiñ dastak mire darīchoñ par
mujhe ye Dar hai na bujh jaa.e terī sham-e-hayāt

sham.a raushan hai sar-e-bazm nigāhoñ meñ magar
kis ko mālūm dabe paañv añdherā aayā

sham.a ke gaah tāj-e-sar haiñ ham
gah patiñge ke bāl-o-par haiñ ham

ye ghane lamhāt ye mauhūm āvāzoñ kā shor
DhūñD le ai sham-e-tanhā.ī ki kho jaate haiñ ham

husn ko dil meñ chhupā kar dekho
dhyān kī sham.a jalā kar dekho

sham-e-ummīd huuñ magar 'sahbā'
band fānūs‌‌‌‌-e-ranj-o-yās meñ huuñ

lau machaltī hai khulī khiḌkī meñ
roz ik sham.a dharī dekhtā huuñ

raushan sī ho ga.ī hai mire dil kī kā.enāt
jo terī ārzuoñ kī ik sham.a jal ga.ī

huī dil meñ jab se hai shola-zan mirī ātish-e-ishq kī har nafas
jo patañg o sham.a meñ dekhiye na vo soz hai na gudāz hai

ma.āl-e-āshiq o māshūq hai ek
sunā hai sham-e-sozāñ kī zabānī