Tags-Shama

lagī jab sham.a kī sī tarah ātish ishq ke sar ko
tasavvur shola-rū kā bāñdh kar jal jal pighal sakiye

agar sābit-qadam ho ishq meñ jiyūñ sham.a jal sakiye
muqābil tund-ḳhū kī teġh-e-abrū ke sambhal sakiye

bujh ga.ī sham-e-haram bāb-e-kalīsā na khulā
khul ga.e zaḳhm ke lab terā darīcha na khulā

sham.a tujh ko bhī munāsib tū vahāñ tak jal jā
sar se tā paa.e tilak rishta-e-zunnār na chhoḌ

jī rahe yā na rahe har qadam-e-yār na chhoḌ
ai patañge tū kabhī sham.a kā anvār na chhoḌ

ai sham.a terī umr-e-tābī.ī hai ek raat
hañs kar guzār yā ise ro kar guzār de

shab se parvāne kī lagan meñ sham.a
sub.h tak roī zaar zaar afsos

suno ki maiñ ne dharī hai sat.h-e-ravāñ pe ik Doltī imārat
aur ek sham-e-tarab ko shahr-e-malāl kā pāsbāñ kiyā hai

sham-e-kushta kī tarah jī liije
dam ghuTe bhī to gila kyā karnā

ham ne garmī-e-sham.a kyā karnī
garmī-e-shauq meñ pighalte haiñ

agar juuñ sham.a-dīd-e-sho.ala-rūyāñ chāhiye 'uzlat'
nazārā tā na jal jā chashm ko namnāk rahne de

khol chashm-e-lutf de jāgīr maqsūd-e-'sirāj'
sham.a-rū parvāna-dil sayyād par baaqī rahā

fareb shab kā giraftār rahūñ bachāo mujhe
jalā ke sham.a koī rāsta dikhāo mujhe

dard juuñ sham.a mile hai shab-e-hijrāñ mujh ko
khā ga.e ro-ro mire dīda-e-giryāñ mujh ko

dil azal se hai sho.ala pairāhan
sham.a jaltī hai rāt-bhar ke liye

phuul khile to dil murjhā.e sham.a jale to jaan jale
ek tumhārā ġham apnā kar kitne ġham apnā.e haiñ

aas kī sham.a pighalne ko hai ab to aa jā
raat baaqī hai sitāroñ meñ chamak baaqī hai

sham-e-mahfil ho ke bhī girvīda-e-mahfil nahīñ
maiñ huuñ duniyā meñ magar duniyā meñ merā dil nahīñ