Tags-Sharab

mire dil kuuñ kiyā be-ḳhud tirī añkhiyāñ ne āḳhir kuuñ
ki jyuuñ behosh kartī hai sharāb āhista āhista

pilā jām-e-sharāb-e-aish vo sāqī-e-bazm-ārā
ġhubār-e-ġham kuuñ lauh-e-dil suuñ ho jaave to kyā hove

hadd-e-amal meñ thī to amal thī yahī sharāb
radd-e-amal banī to mukāfāt ho ga.ī

'nazīr' apnī duniyā to ab tak yahī hai
sharāb āftābī fazā māhtābī

vaa.iz ke maiñ zarūr Darāne se Dar gayā
jām-e-sharāb laa.e bhī saaqī kidhar gayā

nayan meñ dil kī gulābī kā aks jhuum rahā hai
dukhoñ kī dhuum hai aalam sharāb-ḳhāna huā hai

hamesha mai-kade meñ ḳhush-qadoñ kā majma.a hai
hazāroñ sarv lage haiñ kanār-e-jū-e-sharāb

saaqī pilā sharāb magar ye rahe ḳhayāl
ālām-e-rozgār kā chehrā utar na jaa.e

mujh se kahtī thiiñ vo sharāb āñkheñ
aap vo zahar mat piyā kiije

ik din jab būḌhe painter ke paas sharāb ke paise nahīñ the
chhat par ye ghanghor ghaTā tab se is pub kā hissa hai

sab ko maarā 'jigar' ke sheroñ ne
aur 'jigar' ko sharāb ne maarā

sharāb-e-sāf de tā saaf ho saaqī ġhubār-e-ġham
hamārā dil nipaT gard-e-kudūrat se hai ab mailā

ḳhumār utrā nahīñ hai abhī to ashkoñ kā
abhī ye sāġhar-o-mīnā sharāb rahne do

vo sarḳhushī de ki zindagī ko shabāb se bahara-yāb kar de
mire ḳhayāloñ meñ rañg bhar de mire lahū ko sharāb kar de

tujh aisī narm garm ka.ī laḌkiyoñ ke saath
maiñ ne shab-e-firāq Dubo dī sharāb meñ

bhar ke saaqī ne diyā jām-e-sharāb-e-arġhavāñ
'shād' ke chehre pe rañg-e-shādmānī phir gayā

khulī fazā meñ agar laḌkhaḌā ke chal na sakeñ
to zahr piinā hai behtar sharāb piine se

mū se saped ne namak is meñ milā diyā
kaifiyyat ab rahī nahīñ jām-e-sharāb meñ

abr kī tīrgī meñ ham ko to
sūjhtā kuchh nahīñ sivā.e sharāb

tire ḳhayāl se hai masti-e-nazar merī
tirī nigāh se maiñ ne sharāb chhānī hai