Tags-Sharab

āñkheñ haiñ kaTorā sī vo sitam gardan hai surāhī-dār ġhazab
aur usī meñ sharāb-e-surḳhi-e-pāñ rakhtī hai jhalak phir vaisī hī

bosāñ labāñ siiñ dene kahā kah ke phir gayā
pyāla bharā sharāb kā afsos gir gayā

huzūr-e-duḳhtar-e-raz haath paañv kāñpte haiñ
tamām mastoñ ko ra.asha hai rū-ba-rū-e-sharāb

kaffāra-e-sharāb maiñ detā huuñ naqd-e-hosh
sargarm huuñ talāfī-e-a.amāl-e-zisht meñ

janāb-e-shaiḳh ko sūjhe na phir harām o halāl
abhī piyeñ jo mile muft kī sharāb kahīñ

'mīr' un nīm-bāz āñkhoñ meñ
saarī mastī sharāb kī sī hai

nashsha us kī nashīlī āñkhoñ kā
sab se achchhī sharāb jaisā hai

ki hazār pyāloñ kā hai nasha
tere ek qatra sharāb meñ

hue haiñ jab se vo kaif-e-nigah ke ā.ina-dār
bajā.e ashk bharī hai sharāb āñkhoñ meñ

sakūñ milā hai magar iztirāb jaisā hai
tire badan kā fusūñ bhī sharāb jaisā hai

kabhī haath meñ jo sharāb lī vahīñ tum ne chhīn ke pheñk dī
mujhe yaad hai mire pārsā tumheñ yaad ho ki na yaad ho

mīnā-e-mai hai sarv nashāt-e-bahār se
bāl-e-tadrrav jalva-e-mauj-e-sharāb hai

duḳht-e-raz aur tū kahāñ miltī
khīñch laa.e sharāb-ḳhāne se

hai terā aks ki mere ġhamoñ kā saayā hai
nazar to aatā hai paimāna-e-sharāb meñ kuchh

har ek ghūñT meñ yaksāñ nahīñ thī talḳhi-e-mai
ki ghol dete haiñ hālāt bhī sharāb meñ kuchh

chhalak ke kam na ho aisī koī sharāb nahīñ
nigāh-e-nargis-e-ra.anā tirā javāb nahīñ

ḳhudā kī shaan hai ye baat aur muñh un kā
'nizām' phir karūñ tauba sharāb piine se

havā bahisht ke bāġhoñ kī zulf zulf phire
tirī lahad tire bālīñ ke gard jū-e-sharāb

mujh se dariyā-nosh ko saaqī pilātā hai sharāb
dekhtā huuñ maiñ bhī zarf-e-shīsha-o-paimāna aaj