Tags-Sharab

hameñ bhī bāda-gusārī se aar thī lekin
sharāb zarf se kam hī na ho to kyā kiije

tamām raat vo pahlū ko garm kartā rahā
kisī kī yaad kā nashsha sharāb jaisā thā

ḳhayāl lams kā kār-e-savāb jaisā thā
asar sadā kā bhī mauj-e-sharāb jaisā thā

rindoñ ko va.az pand na kar fasl-e-gul meñ shaiḳh
aisā na ho sharāb uḌe ḳhānqāh meñ

josh-o-ḳharosh par hai bahār-e-chaman hanūz
piite haiñ nau-javān sharāb-e-kuhan hanūz

yaar mai-ḳhāne agar kar ga.e ḳhālī ġham kyā
ab bhī abr aatā hai aur ḳhum meñ sharāb aur bhī hai

aarsī suuñ ab sharāb-e-nāb khīñchā chāhiye
niiñd suuñ uTh yaar ne dekhā hai chashm-e-nīm-ḳhvāb

aaj badlī hai havā saaqī pilā jām-e-sharāb
bars kaalī va.ada jaate haiñ baras kaale sahāb

shaiḳh chal tū sharāb-ḳhāne meñ
maiñ tujhe aadmī banā dūñgā

ghaTā vo chhā.ī vo abr uTThā yahī to hai vaqt mai-kashī kā
bulāo 'shā.ir' ko hai kahāñ vo sharāb shīshe se Dhal rahī hai

razm-e-dair-o-haram se tañg aa kar
dil lagāyā sharāb-ḳhāne se

uTh khaḌe ho jo jhuke gardan-e-mīnā-e-sharāb
ḳhidmat-e-bāda-gusārāñ hī sar-anjām karo

sar ma.arka-e-alam hai karnā
thoḌī sī sharāb chāhtā huuñ

agarche shaiḳh hai piinā sharāb fel-e-shanī.a
pa kyā karūñ ki ka.ī din se thī huā baa.is

nasīm-e-mast ke sadqe sharāb ke qurbāñ
lagāte haiñ vo gale baar baar holī meñ

na tū hai aur na maiñ huuñ na vasl hai na firāq
sajā sharāb sajā jā-ba-jā sharāb sajā

jinheñ sahar nigal ga.ii, vo ḳhvāb DhūñDhtā huuñ maiñ
kahāñ ga.ī vo niiñd kii, sharāb DhūñDhtā huuñ maiñ

nazar-e-taġhāful-e-yār kā gila kis zabāñ siiñ karūñ bayāñ
ki sharāb-e-sad-qadah aarzū ḳhum-e-dil meñ thī so bharī rahī

shabāb-o-sher-o-shāhid-o-sharāb se hī kaam hai
agar yahī hai shā.erī to shā.erī harām hai

agar koī ḳhaas chiiz hotī to ḳhair dāman bhigo bhī lete
sharāb se to bahut purāne mazāq kī baas aa rahī hai